Fólk hefur búið eða dvalið í hesthúsum í Hafnarfirði þar sem upp kom eldur í nótt.

Sveinn Heiðar Jóhannesson, varaformaður stjórnar Hestamannafélagsins Sörla, greinir frá því í samtali við fréttastofu Vísis og segir að félagið og fleiri aðilar hafi talað um þetta fyrir daufum eyrum meirihlutans í Hafnarfirði:

„Síðustu árin hafa bæði einstaklingar verið að hreiðra um sig, koma sér þarna fyrir og búa þarna. Svo hefur verið starfsemi sem tengist ekkert hestamennsku. Við viljum að einhver taki á þessu, og virkilega gangi í málið. Það á enginn að búa þarna.“

Greint var frá því snemma í morgun að eldur hefði verið mikill er lögreglu og slökkvilið bar að garði, en að vel hefði gengið að ráða við eldinn.

Eldsupptök liggja ekki fyrir og fer lögreglan með rannsókn málsins.

„Þarna í Hlíðarhúfum eru þetta eru gömul hús, meira en þrjátíu ára gömul, og þegar menn fara að búa þarna fara þeir að drösla alls konar raftækjum og alls konar dóti inn, sem eykur hættuna á því sem akkúrat gerðist í nótt,“ sagði áðurnefndur Sveinn sem bendir þó á að hann viti ekki frekar en neinn annar á þessari stundu hver eldsupptökin hafi verið:

„Ég er ekki að ýja að neinu með það. Það sem ég er að segja að þarna kom að því sem við höfum varað við í mörg ár.“

Að sögn Sveins mun stjórn Hestamannfélagsins Sörla í Hafnarfirði koma saman í næstu viku og ætlar að senda erindi á Hafnarfjarðarbæ vegna málsins.

„Það eru engin geimvísindi að í hesthúsum er kolólöglegt að búa,“ sagði Sveinn og bæti við:

„Ég verð bara að segja að það er mjög einkennilegt að ekki hafi verið gengið í þessi mál. Það er nú samt bara oft þannig að oft þurfa hlutirnir að gerast svo augun opnist.“