Hannes Hólmsteinn Gissurarson, prófessor emeritus í stjórnmálafræði við Háskóla Íslands, hefur verið áberandi í umræðunni um Evrópusambandið undanfarnar vikur og talað eindregið gegn áframhaldandi aðildarviðræðum Íslands við sambandið.

Hannes hefur meðal annars skrifað fjölda greina um málið og birt og deilt efni á samfélagsmiðlum þar sem hann færir rök fyrir afstöðu sinni.

Hann kom jafnframt að því að fá Carl Baudenbacher, fyrrverandi forseta EFTA-dómstólsins, hingað til lands til að halda fyrirlestur um stöðu Íslands gagnvart Evrópusambandinu og Evrópska efnahagssvæðinu. Heimsókn Baudenbachers vakti töluverða athygli og varð að áberandi máli í fjölmiðlum.

Hannes ræddi afstöðu sína til Evrópusambandsins í viðtali við rússneska ríkismiðilinn RT, þar sem hann var spurður út í afstöðu Íslendinga til sambandsins, en viðtalið birtist í gær.

Í viðtalinu hélt Hannes því fram að Ísland hefði ekkert að vinna með inngöngu í Evrópusambandið. Að hans mati myndi aðild meðal annars fela í sér að Íslendingar þyrftu að láta af hendi aukin yfirráð yfir eigin auðlindum.

Hann gagnrýndi jafnframt hvernig Evrópusambandið hefði staðið að stjórnun náttúruauðlinda og sagði sambandið ekki hafa staðið sig sérstaklega vel á því sviði.

Athygli vekur að Hannes hafi kosið að veita RT viðtal, en miðillinn er undir stjórn rússneskra stjórnvalda og hefur um árabil verið sakaður um að gegna lykilhlutverki í áróðurs- og upplýsingastarfsemi stjórnvalda Vladimír Pútín, forseta Rússlands. Evrópusambandið stöðvaði útsendingar og dreifingu RT í aðildarríkjum sínum árið 2022 vegna þess sem sambandið lýsti sem kerfisbundinni upplýsingamisnotkun og dreifingu rangra upplýsinga.