Halla Tómasdóttir, forseti Íslands, hélt hátíðarávarp á Hólahátíð um síðustu helgi og ræddi margt og mikið í því ávarpi. Meðal þess sem hún ræddi um er staðan hjá ungu fólki á Íslandi í dag en forsetinn hefur haft hugann við það efni síðan hún komst til valda. Hún beindi sérstaklega athygli að neikvæðum áhrifum snjalltækja og samfélagsmiðla á líðan barna og ungs fólks.

„Á liðnu ári, því fyrsta í mínu embætti, hef ég lagt mig fram um að hitta og hlusta á ungt fólk,“ sagði forsetinn í ræðu sinni.

„Ég heyri að þau eru mér sammála um alvarleika vandamálanna sem löng dvöl í stafræna hliðarveruleikanum getur haft í för með sér. Þau lýsa fyrir mér vaxandi einmanaleika og hafa sum sterklega á tilfinningunni að þau sjálf séu ekki í lagi eins og þau eru, séu ekki nóg. Þau segja að þær glansmyndir af lífi annarra sem birtast á samfélagsmiðlum láti þeim stundum líða eins og þeirra eigið líf sé ekki nógu spennandi. Þau segja mér frá vaxandi fíkn sinnar kynslóðar í tölvuleiki, klám og fjárhættuspil, efni sem sé öllum aðgengilegt og hannað á útsmoginn hátt til að halda athygli notenda svo fanginni að það er átak að taka eftir bláum himni og hækkandi sól, lesa bók eða hreinlega beina huganum í annan farveg. Þau segja mér líka frá ólíkum birtingarmyndum ofbeldis í stafrænum heimi, allt frá grimmum athugasemdum á samfélagsmiðlum til slagsmála í beinni útsendingu,“ sagði Halla.

„Ég gæti lengi haldið áfram en kjarni málsins er sá að mér finnst ungt fólk beinlínis vera að hrópa á hjálp,“ hélt hún áfram. Hún sagði börnin vera biðla eldra fólks um að vera betri fyrirmyndir og setja þeim skynsamleg og heilbrigð mörk „Við eigum sannarlega að reyna að njóta þess sem tæknin hefur fram að færa en okkur ber líka skylda til að lágmarka þann skaða sem af henni getur hlotist og endurheimta það sem hún hefur nú þegar rænt okkur.“