Heimildin hefur gert ítarlega úttekt á úrræðaleysi sem ungir karlmenn sem glíma við ýmsa erfiðleika upplifa og ber úttektin nafnið Týndu strákarnir – sem fundu leiðina heim.

Í henni lýsa þrír menn reynslu sinni af kerf­inu sem átti að grípa þá sem börn og ung­ling­ar.

Gabrí­el Máni Jóns­son er einn þeirra en lýsir æsku sinni en þegar hann var ungur bjó hann út á landi og leið mjög illa. Hann byrjaði að drekka áfengi 11 ára og segir frá því að hann hafi flutt í Breiðholtið í 9. bekk. Fyrsta daginn hafi einn bekkjarbróðir hans rætt við hann.

„Hann fann mig. Hann sá að ég var með tóbak í vasanum og spurði hvort ég reykti gras því hann vantaði tóbak í grasið sitt. Fyrsta daginn í skólanum reykti ég gras,“ segir Gabríel við Heimildina. „Þegar ég hugsa til baka sé ég að þetta var lausn. Leið til að losna undan hausnum á mér. Það virkaði svo vel að ég hætti ekki. Reiðin var ekki mikið að brjótast út lengur. Það leysti mikið af mínum vandamálum að deyfa mig.“

Gabríel segir einnig að það hafi tekið hann minna en tvær vikur að prófa önnur eiturlyf. „Ég hafði fundið leið til að deyfa mig sem virkaði. Í smátíma var þetta mjög góð lausn. Ég er nokkuð viss um að ég væri búinn að drepa mig ef ég hefði ekki byrjað í neyslu. Mér leið það illa.“