Hildigunnur Svavarsdóttir hefur ákveðið að láta af störfum sem forstjóri Sjúkrahússins á Akureyri frá og með deginum í dag. Ákvörðunin kemur í kjölfar þess að Alma Möller heilbrigðisráðherra hefur ákveðið að auglýsa embætti forstjóra að nýju að loknum fimm ára skipunartíma hennar en sá átti að enda í lok ágúst.
Akureyri.net greinir frá þessu en Hildigunnur lét starfsfólk vita af málinu með tölvupósti fyrr í dag.
Tölvupósturinn til starfsmanna:
Kæra samstarfsfólk.
Heilbrigðisráðherra hefur ákveðið að auglýsa stöðu forstjóra að loknu fimm ára skipunartímabili mínu.
Í ljósi þeirrar ákvörðunar hef ég óskað eftir að láta af störfum frá og með deginum í dag. Ég tel mikilvægt að skýr forysta og fullt traust ríki um stöðu forstjóra og að nýr aðili taki við sem fyrst. Heilbrigðisráðuneytið hefur fallist á þá beiðni.
Það hefur verið mér mikill heiður að starfa með ykkur undanfarin ár og áratugi. Á þessum árum höfum við tekist á við krefjandi verkefni, byggt upp starfsemina og styrkt stöðu sjúkrahússins í þágu sjúklinga og samfélagsins.
Ég vil þakka ykkur af heilum hug fyrir ykkar fagmennsku, elju og samstarf. Hlýjar kveðjur, Hildigunnur Svavarsdóttir
