Þrátt fyrir að milljónir skjala hafi verið birtar og hundruð þekktra einstaklinga nefndir, þar á meðal Elvis Presley og Marilyn Monroe, er langstærstur hluti gagna bandaríska dómsmálaráðuneytisins um Jeffrey Epstein enn óbirtur, samkvæmt nýrri skýrslu.
Blaðamenn Channel 4 News í Bretlandi fengu að sjá innanhússpóst sem sýnir að alríkisrannsakendur reiknuðu með að vinna úr á bilinu 20 til 40 terabætum af gögnum sem tekin voru af eignum Epsteins.
Árið 2020 mátu rannsakendur að gagnamagnið næði allt að 50 terabætum, en árið 2025 skrifuðu embættismenn að þeir væru „að horfa til um það bil 14,6 terabæta af geymdum gögnum“.
Channel 4 bendir á að hingað til hafi 3,5 milljónir skráa verið birtar af dómsmálaráðuneyti Donald Trump, samtals „rúm 300 gígabæt“, sem jafngildir aðeins um 2 prósentum af því gagnamagni sem rannsakendur ræddu um í fyrra. Það þýðir að enn eigi eftir að birta um 175 milljónir skráa.
Skýrsla breska miðilsins Channel 4 News kemur fram nokkrum mánuðum eftir að Epstein Files Transparency Act var undirritað og tók gildi. Með lögunum var Pam Bondi, dómsmálaráðherra Bandaríkjanna, gert skylt að birta öll gögn dómsmálaráðuneytisins sem tengjast Jeffrey Epstein, sem lést árið 2019 á meðan hann beið réttarhalda vegna ákæru um mansal í kynferðislegum tilgangi.
Síðan þá hefur ráðuneytið birt nokkra mjög umfangsmikla gagnapakka, þar á meðal tölvupósta, ljósmyndir og myndskeið, en stór hluti gagnanna hefur verið ritskoðaður. Nýjasti gagnapakkinn var birtur nokkrum vikum eftir lokafrestinn 19. desember, sem lögin kváðu á um fyrir fulla birtingu gagna.
Í byrjun janúar sagði Bondi að ráðuneytið hefði aðeins birt um eitt prósent af heildargögnunum og benti á að starfsfólk hennar ynni yfirvinnu við að yfirfara og birta efnið.
Elvis, Joplin og Trump
Á laugardag sendi dómsmálaráðuneytið sex blaðsíðna bréf til þingsins, þar sem talin voru upp nöfn stjórnmálamanna, viðskiptajöfra og frægra einstaklinga sem komu að minnsta kosti einu sinni fyrir í gögnunum. Bréfið var sent til að uppfylla skilyrði Epstein Files Transparency Act.
Meðal þeirra nafna sem þar komu fram eru forseti Bandaríkjanna Donald Trump, Andrew Mountbatten-Windsor og Bill Gates, ásamt einstaklingum sem virðast ótengdir málinu, á borð við Elvis Presley og Marilyn Monroe, sem létust árið 1977 og 1962. Í listanum var hins vegar ekki skýrt hvernig þessir einstaklingar tengdust Epstein.
Bent er sérstaklega á að það eitt að nafn einstaklings komi fyrir í gögnunum sé ekki vísbending um refsiverða háttsemi.
Í bréfinu sagði aðstoðardómsmálaráðherra Todd Blanche að ráðuneytið hefði „birt öll skjöl, gögn, samskipti og rannsóknarefni í vörslu ráðuneytisins sem tengjast Epstein“, sem gaf til kynna að um lokabirtingu væri að ræða.
Fjöldi þingmanna gagnrýndi þó listann harðlega og sökuðu sumir Trump-stjórnina um að hafa vísvitandi blandað saman óviðkomandi upplýsingum.
„Dómsmálaráðuneytið er enn á ný vísvitandi að rugla saman hverjir voru gerendur og hverjir voru einfaldlega nefndir í tölvupósti,“ skrifaði Ro Khanna,þingmaður demókrata, frá Kaliforníu, á X.
„Að hafa Janis Joplin, sem lést þegar Epstein var 17 ára, á sama lista og Larry Nassar, sem var dæmdur í fangelsi fyrir kynferðisofbeldi gegn hundruðum ungra kvenna og dreifingu barnakláms, án nokkurrar skýringar á því hvernig hvort tveggja kemur fyrir í gögnunum, er fáránlegt,“ bætti Khanna við.
Í síðustu viku hóf dómsmálaráðuneytið einnig að leyfa þingmönnum að skoða útgáfur Epstein-skjalanna með færri ritskoðunum. Eftir að hafa farið yfir gögnin hafa nokkrir þingmenn, þar á meðal Thomas Massie, repúblikani frá Kentucky, haldið því fram að ráðuneytið hafi ranglega ritskoðað mikilvægar upplýsingar.
