Gunnari Smára Egilssyni, formanni framkvæmdastjórnar Sósíalistaflokks Íslands, hefur nú verið bolað út úr framkvæmdastjórninni, en í húsnæði flokksins í Bolholti 6 hefur Samstöðin aðsetur, þar sem Gunnar Smári er ritstjóri.

Eftir harða umræðu síðustu mánuði í kjölfar áskana Karl Héðins Kristjánssonar á hendur Gunnari Smára, lá fyrir eftir aðalfund flokksins í Bolholti í gær að meirihluti næðist utan um breytingar á Sósíalistaflokknum. Gunnar Smári náði þar ekki kjöri, en hóparnir tveir lögðu fram lista. Svokölluð „upprisudeild“ flokksins fór með sigur af hólmi.

„Ég hef sterka tilfinningu fyrir að þessi dagur sé upphaf að einhverju heillavænlegu,“ segir Gunnar Smári á Facebook. „Ég finn fyrir létti og eftirvæntingu, eins og eitthvað áhugavert og spennandi sé framundan.“

Enn á þó eftir að leysa úr tengslum Sósíalistaflokksins, Samstöðvarinnar, Alþýðufélagsins og svo Vorstjörnunnar, sem rekur húsnæðið að Bolholti 6.

Samstöðin ehf. er í 100% eigu Alþýðufélagsins, sem er rekið með fjárframlagi þeirra sem hafa skráð sig sem félaga. Í Alþýðufélaginu er önnur stjórn en í Sósíalistaflokki Íslands. Þó hefur Sósíalistaflokkurinn lánað til reksturs Samstöðvarinnar. Ef marka má stöðuna í árslok í fyrra skuldar Samstöðin Sósíalistaflokki Íslands hátt í 20 milljónir króna. Sumir af þeim sem studdu upprisulistann gegn Gunnari Smára og stuðningsfólki hans höfðu starfað sem blaðamenn á Samstöðinni.

Gunnar Smári greindi frá því í fyrra að lán Sósíalistaflokksins til Samstöðvarinnar mætti síðan „breyta í hlutafé“. Ekki hefur orðið að því samkvæmt gildandi skráningu hjá Fjölmiðlanefnd.

Eitt af því sem Karl Héðinn Kristjánsson gagnrýndi í umræðu um málefni Sósíalistaflokkinn er einmitt þessi flækja. „„Þegar ég var í framkvæmdastjórn og var að reyna að tala um málefni fjármuna flokksins – það er að segja að þeir fari eiginlega allir inn í Vorstjörnuna og Alþýðufélagið – þá er manni sagt að þetta sé ekki vettvangurinn til að ræða um málefni Vorstjörnunnar eða Alþýðufélagsins og Samstöðvarinnar,“ sagði hann í samtali við Heimildina. Óánægjuhópurinn, sem nú hefur náð yfirhöndinni í Sósíalistaflokknum, hefur haldið því fram að Vorstjörnunni sé í reynd stýrt af Gunnari Smára og félögum.

Loks er Gunnar Smári stofnandi Facebook-hópsins sem heldur utan um samskipti Sósíalista. Hópurinn, sem heitir Rauði þráðurinn, var upphaflega stofnaður utan um hugmynd Gunnars Smára um að Ísland yrði 20. fylki Noregs. Stjórnendur hópsins eru Gunnar Smári, Sanna Magdalena Mörtudóttir borgarfulltrúi, Sara Stef Hildar, sem styður Gunnar Smára, og svo facebook-síða Samstöðvarinnar, sem er í eigu Alþýðufélagsins.

Því virðist óljóst hvort nýir stjórnendur Sósíalistaflokks Íslands hafi yfir að ráða því sem fylgt hefur flokknum fram að þessu.

Fjöldi fólks hefur tilkynnt um úrsögn sína úr Sósíalistaflokknum eftir niðurstöðuna. Einn úr upprisuhópnum, Tjörvi Schiöth, tók því fálega þegar flokksmaður tilkynnti á Rauða þræðinum að hann hefði skilað inn úrsögn úr flokknum. „Þetta er ekki flugvöllur, þú þarft ekki að tilkynna brottför.“