Donald Trump, forseti Bandaríkjanna, tilkynnti í dag að „stórfelld hernaðaraðgerð“ væri hafin gegn eldflaugakerfi Írans og að markmiðið væri að „útrýma“ eldflaugum landsins. Þetta kom fram í myndskeiði sem hann birti á samfélagsmiðli sínum þar sem hann dvaldi um helgina á golfklúbbi sínum í Flórída.

Í ávarpinu sagði forsetinn að her Bandaríkjanna hefði hafið víðtækar bardagaaðgerðir í Íran. Markmið aðgerðanna væri að verja bandarísku þjóðina með því að uppræta yfirvofandi ógnir sem stafað gætu af írönskum stjórnvöldum.

„Við ætlum að eyðileggja eldflaugar þeirra og leggja eldflaugaiðnaðinn í rúst. Hann verður algjörlega máður út. Við ætlum að gereyða flota þeirra,“ sagði Trump.

Forsetanum varð einnig tíðrætt um íranska hermenn og bauð þeim annaðhvort „friðhelgi“ legðu þeir niður vopn, eða „vissan dauða“. Þá beindi hann orðum sínum til írönsku þjóðarinnar og sagði að „stund frelsis þeirra væri runnin upp“.

Engar frekari upplýsingar hafa enn verið veittar um umfang aðgerðanna né viðbrögð stjórnvalda í Teheran. Alþjóðasamfélagið fylgist grannt með framvindu mála.