Halldór Árni Sveinsson, myndlistarmaður, fjölmiðlamaður og kennari, er látinn, 71 ára að aldri. Sonur hans, Hörður Brynjar Halldórsson, greindi frá andlátinu á Facebook og Vísir sagði frá því fyrst.

Halldór Árni var þekktur fyrir óbilandi áhuga sinn á Hafnarfirði og skrásetti mannlíf bæjarins um áratugaskeið með myndavél og hljóðnema. Hann stofnaði meðal annars Útvarp Hafnarfjörð og myndaði fjölmarga menningarviðburði og bæjarstjórnarfundi sem hafa mikið heimildagildi.

Auk fjölmiðlastarfa fékkst hann við myndlist og kenndi síðar fjölmiðlafræði við Flensborgarskóla. Margir hafa minnst hans sem eins öflugasta menningarmiðlara Hafnarfjarðar og segja framlag hans til sögu og menningarlífs bæjarins ómetanlegt.