Hannes Hólmsteinn Gissurarson leggur fram skýrslu frá Evrópuþinginu þar sem hann fullyrðir að svo virðist, án þess að hafa lesið hana í þaula, að stofna eigi Evrópuher og segir:
„Jámenn hafa keppst við að gera gys að viðvörunum mínum um Evrópuherinn og herskyldu ungs fólks í aðildarríkjunum. Þeir ættu að lesa þessa skýrslu frá Evrópuþinginu.“
Gauti B. Eggertsson, prófessor í hagfræði við Brown-háskóla í Providence í Rhode Island í Bandaríkjunum, svarar Hannesi þar sem hann segir að Hannes hefði átt að lesa skýrsluna betur áður en hann fór að vitna ranglega í hana.
„Hannes ,það hefði verið sniðugt að lesa skýrsluna áður en þú dreifðir henni. Hún fjallar hvorki um að ESB ætli að stofna Evrópuher né að sambandið geti fyrirskipað herskyldu í aðildarríkjunum. Hún fjallar um ákvarðanir einstakra ríkja um eigin herafla og eigin herskyldu — enda er það á valdi þjóðríkjanna, ekki ESB. ESB getur ekki skipað þjóðríkjum að taka upp herskyldu frekar en NATO.“
Þá segir Gauti að samkvæmt skýrslunni hafi þessar pælingar engin bein áhrif á Ísland vegna þess að á Íslandi er enginn her.
„Skýrslan styður því ekki fullyrðingu þína. Hún leiðréttir hana.
Þetta hefur engin bein áhrif á Ísland, enda hef ég ekki orðið var við að til sé íslenskur her.“
Að lokum mælir hann með því að Hannes lesi meira og skrifi minna.
„Hannes, vinsamleg ábending: Lestu meira, skrifaðu minna — og byrjaðu helst á efninu sem þú dreifir sjálfur og heldur að rökstyðji eigin óra um Evrópuher. Það er stundum meira undir fyrirsögninni. Væri líka skemmtilegra ef þú læsir greinar sem þú telur þig vera að svara. Hef orðið var við að það virðist oft gleymast.“
Evrópusambandið áformar ekki að stofna yfirþjóðlegan Evrópuher
Á vefsíðu Evrópska utanríkisþjónustunnar (EEAS) má finna stefnumörkunina til ársins 2030, þar á meðal ársskýrslur um framgang varnarmála innan Evrópusambandsins. Samkvæmt þessum upplýsingum áformar Evrópusambandið (ESB) ekki að stofna hefðbundinn yfirþjóðlegan Evrópuher, heldur leggur það áherslu á að dýpka varnarsamstarf aðildarríkja þar sem fullveldi hvers lands er virt. Hugmyndin um eiginlegan Evrópuher (e. European Army) undir einni miðstýrðri stjórn í Brussel nýtur ekki fylgis meðal allra aðildarríkja, en breytt öryggisástand í Evrópu sérstaklega eftir innrás Rússa í Úkraínu hefur flýtt mjög fyrir öðrum hernaðarlegum verkefnum sambandsins.
