Lögreglan á landsvísu fékk 612 tilkynningar um heimilisofbeldi á tímabilinu janúar 2025 til og með júní 2025 sem jafngildir um 102 slíkum tilvikum á mánuði að meðaltali en greint er frá þessu í tilkynningu frá Ríkislögreglustjóra. Tilvik á árinu voru 5% fleiri samanborið við meðaltal sama tímabils síðustu þriggja ára á undan
Helstu niðurstöður eru:
- Tilkynningar um heimilisofbeldi voru 10% fleiri á árinu samanborið við sama tímabil og í fyrra.
- Ofbeldi af hendi maka/fyrrum maka svipuð að fjölda og yfir sama tímabil í fyrra
- Ofbeldi af hendi fjölskyldumeðlims gegn systkini, foreldri gegn barni og barn gegn foreldri fjölgar um 29% samanborið við sama tímabil og í fyrra.
„Þegar litið er til heimilisofbeldismála, þ.e. tilvika þar sem grunur er um brot á borð við líkamsárásir, hótanir eða eignaspjöll, voru tilvikin 612,“ segir í tilkynningunni.
„Tilvik þar sem grunur var um heimilisofbeldi af hendi fjölskyldumeðlims gegn systkini, foreldri gegn barni og barn gegn foreldri voru 29% fleiri samanborið við sama tímabil og í fyrra. Hlutfallslega er mesta fjölgun tilvika ofbeldis milli systkina, eða rúmlega tvöföldun slíkra mála. Þar á eftir var 47% aukning tilvika ofbeldis af hendi foreldris í garð barns. Heimilisofbeldi af hendi maka eða fyrrum maka eru algengasta birtingarmynd heimilisofbeldis skráð hjá lögreglu og voru tilvikin 375, eða 2% færri tilvik en meðaltal síðustu þriggja ára.“
Þá segir einnig að fjöldi beiðna um nálgunarbann og/eða brottvísun af heimili hafi verið hlutfallslega lágur miðað við fjölda tilvika heimilisofbeldis tilkynnt til lögreglu.
„Á fyrsta hálfa árinu voru beiðnir um nálgunarbann og/eða brottvísun í 60 málum eða í 13% fleiri málum samanborið við meðaltal síðustu 3 ára á undan. Í skýrslunni er gefinn upp fjöldi mála þar sem var beiðni eða ákvörðun um nálgunarbann, og gat verið um að ræða fleiri en eina beiðni eða ákvörðun innan sama máls.
Dómsmálaráðherra hefur kynnt áform um breytingu á lögum nr. 85/2011 um nálgunarbann og brottvísun af heimili á samráðsgátt stjórnvalda. Helsta breytingin mun felast í að koma á rafrænu eftirliti með staðsetningarbúnaði, að ákveðnum skilyrðum uppfylltum, með þeim sakborningum sem sæta nálgunarbanni og/eða brottvísun af heimili, í þeim tilgangi að slíkri ákvörðun sé framfylgt. Mun frumvarpið byggja á samskonar löggjöf sem reynst hefur vel á Norðurlöndunum, á sérstaklega frá Noregi og Danmörku til að draga úr ítrekuðu heimilisofbeldi og umsáturseinelti.“
Komment