Helgi Seljan blaðamaður, sendir pillur á lögregluna í nýrri Facebook-færslu sem birtist fyrir hádegi en færslan hefur vakið gríðarmikil viðbrögð.

Tilefni færslunnar er frétt RÚV um hótanir sem hafa borist Snorra Mássyni, þingmanni Miðflokksins en hann hefur verið harðlega gagnrýndur fyrir framgöngu sína í Kastljósinu á dögunum þar sem talað var um bakslag í baráttu hinsegin fólks á Íslandi.

Helgi byrjar á að fordæma þær hótanir sem Snorra hefur borist:

„Það er algjörlega óásættanlegt og ógeðfellt að fólki sé hótað og heimili þeirra séu mögulega ekki örugg. Gildir einu hvern um ræðir.“

Í seinni hluta færslunnar koma pillurnar til lögreglunnar en hún hefur stundum verið gagnrýnd í þessum málaflokki:

„Og það er að sama skapi gleðilegt að sjá að lögreglan skuli loksins hafa tekið upp virkt viðbragð og aðgerðir til varnar þeim sem verða fyrir áreiti, hótunum eða umsátri um líf sitt. Allir þeir einstaklingar og allar þær fjölskyldur sem hafa glímt við áralangt umsáturseinelti og ónæði eltihrella, og kvartað hafa réttilega undan skorti á viðbragði og stuðningi yfirvalda, geta því væntanlega andað léttar.“

Eins og áður segir hafa viðbrögðin við færslunni verið mikil en þegar þetta er ritað hafa yfir 250 manns líkað við hana og 14 skrifað athugasemdir. Meðal þeirra sem skrifað hafa athugasemdir við færsluna eru nafntogaðir einstaklingar. Felix Bergsson segir einfaldlega „heyr, heyr“ en Egill Helgason skrifar: „Ég segi kannski einhvern tíma sögurnar frá því ég var með Silfur Egils og því sem gekk á þeim tíma.“

Sigmundur Ernir Rúnarsson tjáði sig einnig: „Sú var tíðin að skúrkar sögðust vita á hvaða leikskóla börn manns væru …“ en Svavar Knútur svaraði: „það er nú enn get ég sagt þér.“

Gamli fjölmiðlarefurinn Eiríkur Jónsson lýsir einnig í athugasemdum því sem hann hefur lent í í gegnum tíðina: „Þeir hringdu og sögðust vita að sonur minn svæfi i vagni á bak við húsið sem ég bjó í - brenndu gat með sígarettu á nafn mitt á dyrasíma og klíndu tyggjói á allan bílinn minn í miklu magni. Síðar rispuðu þeir nýsprautaðan Bens sem ég átti með lykli líklega - alla fleti bílsins. Er þá fátt nefnt.“