Héraðsdómur Reykjaness hefur dæmt ónafngreindan karlmann í átta mánaða fangelsi fyrir sérstaklega hættulega líkamsárás og brot í nánu sambandi.

Honum var gefið að sök að hafa veist að sambýliskonu sinni, á þáverandi dvalarstað þeirra og slegið hana með krepptum hnefa í hægri kinn og í framhaldi slegið hana í aftanvert höfuð með glerkertastjaka, allt með þeim afleiðingum að hún hlaut væga bólgu og roða á hægra kinnbeini og mar, bólgu og 1 sm skurð aftarlega á hvirfli sem þurfti að sauma. Árásin átti sér stað 2. febrúar 2023.

Hinn ákærði játaði brot sitt en samkvæmt dómnum hefur hann ekki sakaferil svo máli skipti. Hann hafi lýst yfir iðrun og liðið illa vegna þess sem hann hefði gert.

Hann var því dæmdur í átta mánaða fangelsi en dómurinn er skilorðsbundinn til tveggja ára. Þá þarf hann að greiða 401.760 króna þóknun skipaðs verjanda síns, Unnsteins Arnar Elvarssonar lögmanns, og 45.648 króna annan sakarkostnað.