Betur fór en á horfðist í morgun í Mosfellsbænum þegar hringja þurfti á sjúkrabíl vegna atviks sem kom upp í sundlauginni að Varmá. Þurfti gestur laugarinnar að bjarga öðrum en að sögn vitna var maðurinn orðinn náfölur og stóð varla í lappirnar.

Mannlíf ræddi við stuttlega við hetjuna sem bjargaði málunum. Hann segist hafa verið að koma úr pottinum með eiginkonu sinni þegar hann sá hóp af fólki í uppnámi hjá gufubaði laugarinnar.

„Það var dálítið mikið af fólki þarna og ég ætla ekkert að kíkja inn en ákveð að „tjékka.“. Þá er einhver gæi búinn að limpast niður og svona hálfstendur í sturtunni gjörsamlega fölur niður að nafla. Ég sé það eru bara allir að horfa og ég tek utan um hann og segi „Það verður að leggja hann niður og lappir upp.“. Hann er allur stífur og ég held utan um hann og höfuðið og legg hann niður og set svo lappirnar upp í loft. Hann nær ekki að tjá sig fyrr en kannski svona 15-20 sekúndum síðar þá segir hann eitthvað og liturinn byrjar að lagast á honum,“ sagði bjargvætturinn um atvikið.

„Svo fer ég bara í sturtu og sjúkrabíll kemur og tekur við.“

Í samtali við Mannlíf upplýsti starfsmaður sundlaugarinnar að maðurinn hafi verið fluttur með sjúkrabíl úr lauginni. Lögreglan hafði engar upplýsingar um líðan mannsins þegar leitast var eftir því.