Vilhjálmur H. Vilhjálmsson, verjandi knattspyrnumannsins Alberts Guðmundssonar, gefur lítið fyrir störf Símons Sigvaldasonar, dómara við Landsrétt, en Símon vildi dæma Albert í tveggja og hálfs árs fangelsi og var dómurinn þríklofinn í máli Alberts.
Hann var að lokum sýknaður bæði í Héraðsdómi Reykjavíkur og Landsrétti.
„Þetta er auðvitað maður sem er eiginlega búinn að gera sjálfan sig ómarktækan í dómstörfum sínum með því að sakfella bara alltaf og hann gerði það líka í þessu tilviki,“ sagði Vilhjálmur við RÚV um Símon.
Vilhjálmur sagði einnig að aldrei hefði átt að gefa út ákæru í málinu til að byrja með og hún hafi verið gefin út á röngum forsendum
Búið er að staðfesta að Landréttardómnum verði ekki áfrýjað og sendi Albert Guðmundsson frá sér yfirlýsingu um málið í gær.
Yfrlýsing Alberts Guðmundssonar
Þá er þessu máli endanlega lokið.
Nú eru 893 dagar liðnir síðan atvikin áttu sér stað. Ég var þarna, ég man allt og ég veit hvað er satt og rétt.
Ég er ánægður að sjá Landsrétt staðfesta niðurstöðuna sem Héraðsdómur komst áður að – og ekki má gleyma að héraðssaksóknari felldi málið einnig niður á sínum tíma. Þetta kalla ég sannfærandi 3–0 sigur í minni vinnu.
En samt sit ég hér, tæpum þremur árum seinna, eftir að hafa verið undir smásjá fjölmiðla nánast daglega allan þennan tíma. Það hefur tekið á – bæði andlega og líkamlega. Þetta mál hefur komið í veg fyrir mörg tækifæri í fótboltanum; eins og allir vita er ferillinn stuttur og hvert ár, hver mánuður og jafnvel hver dagur dýrmætur.
Ég er þó ekki að biðja um vorkunn. Það sem hélt mér gangandi voru mínir nánustu. Börnin mín, barnsmóðir mín, foreldrar mínir, systur mínar, fjölskyldan og vinir. Þið eruð hetjurnar í þessu ferli. Ég get aldrei þakkað ykkur nóg.
Á hinn bóginn hef ég líka misst fólk sem reyndist aðeins vera vinir þegar það hentaði þeim – en ekki þegar á þurfti að halda. Það særði, en það var líka gott að átta sig á því fyrr en síðar.
Á móti stóðu aðrir með mér og sýndu mér hvað sönn vinátta er. Þeim er ég innilega þakklátur.
Ég veit að það er fólk þarna úti sem mun ekki trúa mér, sama hvað gögn málsins eða niðurstöður sýna – og það er í góðu lagi. Ég veit hver ég er og fyrir hvað ég stend. Skoðun annarra mun aldrei brjóta mig.
Til ykkar sem enn eruð í vafa hvet ég ykkur til að lesa dóma beggja dómstiga og hafa í huga að samkvæmt gögnum málsins voru fleiri en bara ég ásakaðir þetta umrædda kvöld. Ég læt þó ekki kúga mig, sérstaklega ekki fyrir eitthvað sem aldrei gerðist. Við getum farið nánar út í það síðar ef þarf.
Ég vona einlæglega að þótt eitt skemmt epli hafi verið þarna úti, þá skemmi það ekki fyrir þeim sem eru raunveruleg fórnarlömb ofbeldis.
Ekki meira í bili — peace
