Einstaklingur var handtekinn grunaður um líkamsárás, rán, íkveikju og þjófnað í einu fjölmargra mála sem komu á borð lögreglunnar á höfuðborgarsvæðinu í gærkvöldi og í nótt.

Annar einstaklingur var handtekinn fyrir að hafa ekki hlýtt fyrirmælum lögreglu og fyrir vopnaburð á almannafæri. Þá var einstaklingur handtekinn vegna gruns um ólöglega sölu áfengis.

Lögreglu barst einnig tilkynning um líkamsárás við verslun auk þess sem tilkynnt var um þjófnað og eignaspjöll í herbergi.

Nokkuð var um umferðarlagabrot. Ökumaður var handtekinn vegna ölvunaraksturs og annar vegna gruns um akstur undir áhrifum fíkniefna.

Alls voru 15 ökumenn kærðir fyrir að nota farsíma við akstur. Tveir ökumenn voru kærðir fyrir að aka gegn rauðu ljósi og einn fyrir að virða ekki rétt gangandi vegfaranda á gangbraut.

Þá var ökumaður kærður fyrir að aka á 101 kílómetra hraða á klukkustund þar sem hámarkshraði er 60 kílómetrar á klukkustund.

Að lokum voru tveir ökumenn kærðir fyrir að aka þrátt fyrir að hafa verið sviptir ökurétti.