Karlmaður úr Mosfellsbæ hefur verið dæmdur af Héraðsdómi Reykjavíkur.
Hann var ákærður fyrir fíkniefnalagabrot, með því að hafa, þann 20. desember 2023, haft í vörslum sínum í sölu- og dreifingarskyni 61,08 grömm af amfetamíni, 43,13 grömm af hassi, 632,09 grömm af kannabisblönduðu efni, 11,86 grömm af kókaíni, 47,63 grömm af maríhúana, 18,50 millilítra af kannabisblönduðum vökva og 20 stykki af lyfseðilsskylda læknislyfinu Viagra (Sildenafil), án þess að hafa markaðs- og lyfsöluleyfi Lyfjastofnunar og án þess að hafa lyfseðil eða lyfjaávísun fyrir lyfjunum í læknisfræðilegum tilgangi. Lögreglan gerði einnig 213.000 krónur upptækar.
Maðurinn játaði brot sitt en hann gekkst undir greiðslu sektar með lögreglustjórasekt Lögreglustjórans á höfuðborgarsvæðinu 29. júlí 2024, meðal annars fyrir vörslu fíkniefna og hafði það áhrif á þennan dóm.
Mosfellingurinn var dæmdur í 90 daga fangelsi en er dómurinn skilorðsbundinn til tveggja ára.
