Ársæll Guðmundsson, skólameistari Borgarholtsskóla, gefur í skyn að Inga Sæland, félags- og húsnæðismálaráðherra, hafi verið drukkin þegar hún hringdi í hann í janúar til að spyrjast fyrir skó sem barnabarn hennar fann ekki. Þetta segir hann í viðtali við Morgunblaðið.
Greint var frá því í gær að Ársæll verði ekki endurskipaður skólameistari þegar skipunartíma hans lýkur á næsta ári en Guðmundur Ingi Kristinsson, mennta- og barnamálaráðherra, tók þá ákvörðun. Kennir skólameistarinn Flokki fólksins um starfslok sín og vísar í „skómálið“ svokallaða.
Í viðtali við Morgunblaðið segir Ársæll frá símtalinu og upplifun hans á því. „Ef þú hefðir spurt mig þá hefði ég haldið að hún væri drukkin, en þetta var í síma svo það get ég ekki vitað,“ sagði skólameistarinn.
Hann sagði einnig að Inga hafi hótað honum með lögreglu en hún hefur neitað því. „Já, það er nú lítið mál fyrir mig núna því að ég hef mikil ítök í lögreglunni,“ segir Ársæll að Inga hafi sagt.
Bréf sem Ársæll sendi á starfsfólk til að tilkynna starfslok sín
Kæra samstarfsfólk
Það er með miklum trega og með sorg í hjarta að ég skrifa ykkur þennan tölvupóst til að upplýsa ykkur um að Guðmundur Ingi Kristinsson, mennta- og barnamálaráðherra hefur látið birta mér að hann óski ekki eftir kröftum mínum sem skólameistara. Þvert á allar hefðir og í ljósi þess að undanfarið hefur ráðherra endurskipað aðra skólameistara og nýlega ráðið í lausar stöður er augljóst hvað liggur að baki ákvörðun Guðmundar Inga og Flokks fólksins. Ég hef aldrei verið áminntur í starfi eða fengið ákúrur frá ráðherra menntamála þá áratugi sem ég hef starfað sem skólameistari og ætíð haldið rekstri skólans innan fjárlagaheimilda.
Skipunartími minn rennur út um mitt næsta ár eða tveimur árum áður en ég kemst á eftirlaunaaldur og eru þá rétt 40 ár síðan ég brautskráðist sem kennari úr Kennaraháskóla Íslands. Ævistarfi mínu finnst mér lítill sómi sýndur og þakklætið rýrt en ráðherra afhenti mér ekki sjálfur tilkynninguna heldur fékk starfsfólk sitt til að sjá um það. Skýring þeirra á þessari ákvörðun ráðherra er sú að ráðherra hefði heimild til að gera þetta.
Ég er nú í þeirri skrýtnu stöðu að vera forstöðumaður fyrir ríkisstofnun þar sem ráðherra hefur í raun lýst yfir vantrausti á störf mín og ég því nánast umboðslaus.
Sjálfur hefði ég kosið að starfa áfram við skólann við að efla okkar góða starf og styrkja enda margar áskoranir framundan. Vinnustaðurinn okkar er frábær, starfsandinn góður og fagmennska í fyrirrúmi. Þykir mér afar leitt að vera hent frá borði með þessum hætti. Á allri minni ævi hef ég ekki kynnst betri vinnustað en nú skilja leiðir.
Bestu kveðjur
Ársæll
