Guðmundur Ingi Kristinsson mennta- og barnamálaráðherra tók á móti barna- og ungmennaráði heimsmarkmiða Sameinuðu þjóðanna á fundi ríkisstjórnar í morgun ásamt öðrum ráðherrum ríkisstjórnar Íslands

Á fundinum kynntu fulltrúar ráðsins tillögur sínar og áherslur er varða heimsmarkmið Sameinuðu þjóðanna, og einnig hvernig þau sjá fyrir sér að staðið verði að framgangi þeirra hér á landi.

Alls eru tillögurnar tíu; fjalla þær um skólamál - heilbrigðismál, lýðræði, fjölbreytileika og heildstæða ungmennastefnu.

Eftir að kynningu ungmennanna var lokið átti Guðmundur Ingi Kristinsson, mennta- og barnamálaráðherra, ásamt öðrum ráðherrum ríkisstjórnarinnar mjög gott samtal við börnin um það sem þeim liggur mest á hjarta og sýn þeirra á verkefnin fram undan sem lúta að heimsmarkmiðunum.

„Í vetur gaf mennta- og barnamálaráðuneytið út leiðarvísi um hagsmunamat út frá réttindum barna í allri stefnumótun stjórnvalda. Markmiðið er að stjórnvöld séu meðvituð um hvaða áhrif ákvarðanir þeirra hafa á börn og réttindi þeirra,“ segir Guðmundur Ingi og bætir því við ekki sé bara nóg að hlusta heldur „einnig innleiða mat á hagsmunum barna í okkar verklag.“

Tilgangur fundarins er að skapa vettvang þar sem ungmenni geti komið sínum sjónarmiðum á framfæri við stefnumótandi aðila um heimsmarkmiðin, sjálfbæra þróun og önnur málefni sem þau varða.

Ungmennaráðið samanstendur af 12 fulltrúum, víðast hvar af landinu, á aldursbilinu 13 til 18 ára.

Barnasáttmáli Sameinuðu þjóðanna kveður skýrt á um rétt barna til að láta skoðanir sínar í ljós og til að hafa áhrif á málefni er þau varða.

Fyrir sjö árum var ákveðið að virkja þátttöku ungmenna á Íslandi í gegnum barna- og ungmennaráð heimsmarkmiða Sameinuðu þjóðanna og er hlutverk ráðsins það að fræðast og fjalla um heimsmarkmiðin, ásamt því að koma áherslumálum sínum á framfæri.