Lögfræðineminn og fjölmiðlakonan Nína Richter segir frá reynslu sinni af kynbundnu áreiti og mismunun á íslenskum vinnustöðum í pistli sem birtist á DV. Þar lýsir hún meðal annars því sem hún varð fyrir í fjölmiðlum, en pistllinn kom út í kjölfar Kvennafrídagsins og ber heitið Þessir fokkings baráttudagar kvenna.

Nína segir frá því að þegar hún starfaði á stórum fjölmiðli hafi hún orðið fyrir miklum þrýstingi og lítið tillit hafi verið tekið til hennar þegar alvarleg veikindi komu upp í fjölskyldunni.

„Yfirmaður boðaði mig á lokaðan fund og tjáði mér að ég væri augljóslega ekki með rétta persónuleikann til að vinna undir álagi,“ skrifar hún.

Hann bætti því við að hún væri „sennilega ekki manngerðin sem gæti unnið í fjölmiðlum“.

Nína segist hafa sagt starfi sínu lausu nokkrum mánuðum síðar, og fáeinum dögum eftir starfslokin hafi sami yfirmaður „like-að“ bikini-mynd af henni á Instagram um miðja nótt.

Síðar hóf hún störf á öðrum fjölmiðli, þar sem hún segir að áreitið hafi tekið á sig nýja mynd.

„Eftir að ég fékk stöðuhækkun upphófst gróft kynbundið vinnustaðaeinelti sem endaði með inngripi stjórnenda og formlegri innanhússrannsókn,“ segir hún.

Rannsóknin hafi leitt í ljós að um áreiti og einelti hefði verið að ræða.

„Ég skipti um deild,“ bætir hún við.

Í pistlinum fjallar Nína einnig um víðtækara misrétti sem hún segist hafa orðið vör við í gegnum tíðina, frá skólagöngu til atvinnulífs. Hún segir mýtuna um Ísland sem jafnréttisparadís eina verstu hindrunina í vegi framfara.

„Við getum ekki tekið á vandamálunum þegar við göngumst ekki við þeim,“ skrifar hún að lokum.