Í dagbók lögreglu frá því í nótt og í gærkvöld er sagt frá því að lögreglumenn hafi veitt torfærutæki sérstaka athygli en tækið var án skráningarnúmera.

Lögreglumennirnir ákváðu að gefa sig á tal við ökumann vegna ýmsa brota varðandi gerð og búnað tækisins þegar ökumaðurinn ákvað að reyna að komast undan akandi. Við tilraun ökumannsins að stinga lögreglu af ók hann ítrekað gegnt rauðu ljósi og virti ökumaðurinn ekki hámarkshraða þeirra gatna sem hann ók. Að lokum hafði hann ekki erinda sem erfiði og var stöðvaður og handtekinn, grunaður um fjölda umferðarlagabrota sem og að stofna lífi og/eða heilsu annarra í augljósan háska.

Tilkynnt var um aðila vera að brjótast inn í bifreið. Var því veitt sérstök athygli að sá hafði virst alveg rólegur við þessa iðju. Í ljós kom að sá tilkynnti virtist vera umráðamaður bifreiðarinnar og voru kveikjuláslyklarnir eitthvað farnir að klikka og því hafi hann þurft að opna bifreiðina með öðrum ráðum.

Tilkynnt var um yfirstandandi innbrot í gám. Tveir aðilar reyndu að komast undan lögreglu en rétt eins og ökumaðurinn á torfærutækinu tókst þeim það ekki og voru handteknir.

Einnig var tilkynnt um aðila með hníf á lofti og öskrandi við verslunarmiðstöð. Sá hlýddi ekki fyrirmælum lögreglu en var á endanum handtekinn. Aðilinn var vistaður í fangaklefa í þágu rannsóknar málsins en hann er grunaður um brot á vopnalögum.

Óskað var eftir aðstoð lögreglu vegna líkamsárásar í bifreið. Brotaþoli reyndist vera með minni háttar áverka og er málið í rannsókn.