Fallegt og vandað einbýlishús í friðsælli götu í Skerjafirði í Reykjavík hefur verið sett á sölu og er óskað eftir tilboðum í eignina.

Húsið stendur á eftirsóttum stað í nálægð við náttúru og útivistarsvæði, sem gerir það sérstaklega aðlaðandi fyrir fjölskyldur og náttúruunnendur.

Eignin var byggð árið 1975 og teiknuð af arkitektastofunni ARKO. Hún er skráð alls 220 fermetrar að stærð, þar með talið bílskúr. Að auki fylgir 30 fermetra innréttað en óskráð rými sem tilheyrir aukaíbúð, sem gerir heildarstærð eignarinnar um 250 fermetra.

Í húsinu er þriggja herbergja aukaíbúð með sérinngangi, en einnig er innangengt á milli hennar og aðalíbúðar. Þetta fyrirkomulag býður upp á fjölbreytta nýtingarmöguleika, hvort sem er til útleigu eða sem hluti af stærra heimili.

Lóðin er 647 fermetra eignarlóð og hefur bæði hús og lóð fengið töluverða endurnýjun á undanförnum árum. Viðhald eignarinnar er því sagt gott.