Brynjar Níelsson, fyrrum þingmaður Sjálfstæðisflokksins og fyrrum dómari, skipar þriðja sætið hjá Sjálfstæðisflokknum í komandi borgarstjórnarkosningum en fáir eru opnari um skoðanir sínar en þingmaðurinn fyrrverandi.
Í færslu sem Brynjar birti fyrr í dag greinir hann Silfrið sem sýnt var á RÚV í gær.
„Oddvitar Sjálfstæðisflokksins, Viðreisnar og Samfylkingarinnar voru í Silfrinu í gær. Ég er ekki hlutlaus í afstöðu minni til þessara framboða en sjón er sögu ríkari fyrir kjósendur og ég mæli með tímaflakkinu fyrir þá sem ekki sáu þáttinn í línulegri dagskrá,“ skrifar þingmaðurinn fyrrverandi en honum gekk illa að skilja Pétur Marteinsson, nýjan oddvita Samfylkingarinnar, í þættinum.
„Nýr maður er í brúnni hjá Samfylkingunni, sem var lengi vel í Sjálfstæðisflokknum eins og svo margir aðrir oddvitar framboða í borginni. Ég geri engar athugasemdir við það og var sjálfur lengi vel heitur fyrir Flokki fólksins. Það er aldrei of mikið af sjálfstæðismönnum í framboði. Oddvitarnir voru allir mjög geðþekkir en mér gekk illa að skilja oddvita Samfylkingarinnar og málflutningurinn nokkuð mótsagnarkenndur. Helst var á honum að skilja að borgin væri sú besta í heiminum ef ekki í veröldinnni þrátt fyrir öll skipulagsslysin, enginn kæmist ferða sinna með góðu móti, fáir vilji vinna á leikskólum, nemendur í grunnskóla væri meira og minna ólæsir, skólahúsnæði myglað og lögbundin þjónusta heldur lakari en í nágrannasveitarfélögum þrátt fyrir hærri álögur á íbúa. Þá væri rekstur borgarinnar í það góðum málum að mati odddvitans að hagræðing væri eiginlega ástæðulaus,“ heldur Brynjar áfram.
„Ljóst er að íbúar borgarinnar geta ekki vænst breytinga verði Samfylkingin áfram við stjórn borgarinnar. Ég gef sjaldan loforð, en tel mig þó geta lofað borgarbúum því að það verða engar breytingar í borginni fái Sjálfstæðisflokkurinn ekki afgerandi góða kosningu í vor. Það er margreynt að kjósa aðra flokka. Nú er bara spurningin sú hvort borgarbúar vilji breytingar eða óbreytta stefnu,“ skrifar Brynjar að lokum.
