Einbýlishús við Smyrlahraun 5 í Hafnarfirði hefur verið sett á sölu fyrir 125,9 milljónir króna. Húsið var upphaflega reist árið 1925 en hefur síðan gengið í gegnum umfangsmikla endurbyggingu þar sem áhersla var lögð á að varðveita svipmót eldri tíma.

Eignin stendur á 305 fermetra lóð og henni fylgir sérbílastæði. Húsið var endurnýjað og endurbyggt á árunum 2007 til 2009. Við framkvæmdirnar var stór hluti gamla hússins fjarlægður og það teiknað að nýju af Páli Bjarnasyni arkitekt. Jafnframt var húsið stækkað töluvert og skipulagi þess breytt.

Við hönnunina var sérstök áhersla lögð á að halda í upprunalegan anda hússins og útlit sem hæfði byggingarárinu. Það sést meðal annars á gluggum, útskornum gluggaáfellum og tréverki, þar sem eldri byggingarstíl er blandað saman við nútímalegri lausnir.

Endurbæturnar náðu bæði til innra og ytra byrðis hússins. Vatns- og raflagnir voru endurnýjaðar auk skólps og frárennslis. Þá voru innréttingar, gólfefni, tæki, gluggar, gler og hurðir endurnýjuð.

Gólfhiti er á báðum hæðum hússins og er hægt að stýra hitastigi sérstaklega í hverju rými.

Lóðin er að mestu fullfrágengin en samkvæmt sölulýsingu á eftir að ljúka hluta pallaframkvæmda á baklóðinni við tvo bakútganga hússins.

Húsið hefur einnig nýlega verið málað að utan af fagmönnum. Við litavalið var farið eftir litanúmerum Páls Bjarnasonar arkitekts.

Ásett verð eignarinnar við Smyrlahraun 5 er 125,9 milljónir króna, rúmri öld eftir að húsið var fyrst reist.