Heiðrún Emilía Jónsdóttir, framkvæmdastjóri Samtaka fyrirtækja í fjármálaþjónustu, kom fram um helgina í viðtalaröð Mannlífs við stjórnendur.

Hún er lögmaður með fjölbreytta reynslu og hefur verið framkvæmdastjóri hjá KEA, Símanum og Eimskip á miklum umrótatímum. Heiðrún leggur áherslu á að vera hreinskiptin í samskiptum og að treysta samstarfsmönnum í þeim verkefnum sem þeir bera ábyrgð.

Heiðrún ræddi eitt og annað í viðtalinu og meðal þess sem hún ræddi var torkennilegur heilsubrestur gerði síðan vart við sig árið 2023.

„Haustið 2023 var ég í vinnuferð í Stokkhólmi. Ég fór að fá sjóntruflanir á öðru auga, svipað eins og mígreni. Í skoðun á Íslandi kom í ljós að ég var með bólgna sjóntaug í hægra auga. Það hefur aldrei komið í ljós hvað þetta er en ég missti nær alla sjón á auganu. Ég var búin að vera undir miklu álagi en þegar þarna var komið sögu var allt að komast í eðlilegt horf. Ég ætla ekki að útiloka að undir miklu og langvarandi álagi geti eitthvað í líkamanum gefið eftir. Sjónina hef ég ekki fengið til baka. Ég var sjúklega hrædd á þessum tíma um að sama myndi koma fyrir hitt augað,“ sagði Heiðrún.

Heiðrún var í rannsóknum í um sex mánuði og var fyrst greind með MS en síðar kom í ljós að svo var ekki. Hún segist hafa fengið afar góða þjónustu, var send í alls konar rannsóknir til að útiloka mögulega sjúkdóma. Það fannst ekkert sem skýrt gat hvers vegna sjóntaugin bólgnaði. „Ég fékk greininguna NAION, það er óútskýrt hvers vegna bólga kom í sjóntaug sem leiddi til skemmda. Niðurstöður rannsóknanna voru sendar til Karolinska í Svíþjóð þar sem sænskir sérfræðingar í augnsjúkdómum fóru yfir allar rannsóknir og komust að sömu niðurstöðu.

Auðvitað var áfall að missa sjónina. Ég fann fyrir heilsukvíða í fyrsta sinn og var hrædd um að þetta færi í hitt augað. Fjarlægðaskynið minnkaði og ég var klaufi í fyrstu. Kaffibollinn var fyrir framan mig en ég sá hann ekki og hellti niður. Þá var ég að reka mig í fólk eða hluti. Og ekki batnaði golfið við þetta.“