Ingólfur Bjarni Sigfússon, fréttamaður RÚV, tilkynnti á samfélagsmiðlum fyrr í dag að hann hefði sagt upp störfum sem ritstjóri Kveiks en hann hefur starfað við þáttinn í átta ár.

Ingólfur segir í færslu á samfélagsmiðlum að þetta sé ekkert stórmál eða dramatískt en hann muni snúa aftur á RÚV þegar líður á veturinn.

„Ritstjórn Kveiks er að missa mjög öflugan og reyndan liðsmann en Ingólfur Bjarni er eini fréttamaðurinn sem var eftir úr upprunalegu ritstjórninni sem var sett saman árið 2017, “ sagði Heiðar Örn Sigurfinnsson, fréttastjóri RÚV, um brottför Ingólfs við Mannlíf.

„Þátturinn verður þó ekki án ritstjóra næstu vikurnar því Tryggvi Aðalbjörnsson hefur að minni ósk fallist á að vera starfandi ritstjóri þar til ráðið hefur verið í stöðuna,“ en Tryggvi hefur meðal annars starfað fyrir New York Times auk starfa sinna á RÚV. 

Jóhann Bjarni Kolbeinsson, Gunnhildur Kjerúlf Birgisdóttir og Kristín Sigurðardóttir verða í Kveiksteyminu í haust samkvæmt Heiðari. Með þeim verða þrír framleiðendur og eru þeir Arnar Þórisson, Ingvar Haukur Guðmundsson og Árni Þór Theodórsson.