Ekkert bendir til að starfsmaður leikskólans Múlaborgar, sem er í haldi lögreglu grunaður um brot gegn barni á leikskólanum, hafi brotið gegn fleiri börnum.

Í dag fundaði lögregla með foreldrum og starfsfólki leikskólans.

Maðurinn var tekinn höndum á þriðjudaginn og var hann úrskurðaður í vikulangt gæsluvarðhald, eftir að foreldrar eins barns í skólanum höfðu leitað til lögreglu vegna gruns um kynferðisbrot gegn barni sínu á áðurnefndum leikskóla.

Hefur lögregla þegar rætt við öll börnin á deildinni þar sem maðurinn vann, með hjálp barnaverndarfulltrúa.

Foreldrum sem og starfsfólki var boðið til fundar með lögreglu og fulltrúum Reykjavíkurborgar, og Barna- og fjölskyldustofu í dag.

Samkvæmt áreiðanlegum heimildum Mannlífs hafa foreldrar barna á leikskólanum fengið það uppgefið að ekkert bendi til annars en að atvikið hræðilega sé einstakt tilfelli.

Mannlíf heyrði í einu foreldri sem á barn á leikskólanum, og vildi viðkomandi ekki tjá sig undir nafni, en sagði að foreldrum hefði eðlilega verið létt eftir að svo virðist sem maðurinn hafi ekki brotið gegn öðrum börnum. Almennt sagði maðurinn að öllum er tengjast leikskólanum með einum eða öðrum hætti væri verulega brugðið eftir að mál þetta kom upp og að hugur allra væri hjá fórnarlambinu og fjölskyldu hans.