Sveinn Andri Sveinsson, lögmaður og fyrrverandi borgarfulltrúi Sjálfstæðisflokksins, greinir frá því færslu á samfélagsmiðlum að hann hafi mætt á Austurvöll í gær á fundinn sem bar yfirskriftina Þjóð gegn þjóðarmorði.

„Eins og annars staðar í heiminum krefst mikill meirihluti almennings á Íslandi þess að þjóðarmorð (hópmorð) og stríðsglæpir Ísraels á Gaza verði stöðvað,“ skrifar lögmaðurinn. Þá skrifar hann að þögn Sjálfstæðisflokksins í málinu sé æpandi meðan aðrir fordæmi glæpi Ísraelsstjórnar. „En ef marka má helsta hugmyndafræðing flokksins, Hannes Hólmstein Gissurarson er stuðningur Sjálfstæðisflokksins við hin fasísku glæpastjórnvöld í Ísrael óbilaður og sterkur,“ skrifar Sveinn að lokum.

Við þessi orð Sveins er fjölmiðlamaðurinn Stefán Einar Stefánsson, sem vinnur á Morgunblaðinu, ósáttur en hann hefur ítrekað tekið afstöðu með Ísrael þegar kemur að málefnum Palestínu. „Svo ertu svo góður maður að þú hlýtur að styðja stofnun nýs hryðjuverkaríkis. Það er svo skynsamlegt út frá gefinni reynslu. Þetta á allt eftir að fara vel í höndum fólks sem hugsar svona djúpt og skynsamlega,“ skrifar Stefán.

Sveinn var ekki lengi að svara þessu og biðst afsökunar. „Fyrirgefðu að ég skyldi ekki nefni þig til sögunnar sem annan hugmyndafræðing Sjálfstæðisflokksins. En vissulega ert þú eins og HHG talsmaður barnamorða.“

En Stefán Einar segist ekki vera með neitt líf á samviskunni, hvorki barna né annarra og spyr lögmanninn hvort hann geti sagt hið sama.

„Ég ætla rétt að vona að hvorugur okkar sé með barnslif á samviskunni. Stuðningsmenn stjórnvalda sem stunda morð á börnum í tugþúsundavís hafa þau hins vegar óbeint á samviskunni,“ skrifar Sveinn svo.

„Já það skulum við báðir vona,“ skrifar Stefán Einar. „Þú hefðir þrammað um bæinn og andmælt aðgerðum bandamanna í lok seinna stríðs. Það máttu engin börn falla þegar nasistarnir, vinir þínir, voru sigraðir. Það er vegna þess að þú býrð í Disney-veröld þar sem þið reyndar leyfið ykkur óheft að opinbera hatur ykkar á gyðingum. Vel gert. Sama mynstrið æ ofan í æ.“

Hannes Hólmsteinn Gissurarson blandaði sér einnig í umræðuna og hann kunni ekki að meta hana. „Það er ótrúlegt að lesa þennan texta: að ég sé talsmaður barnamorða! Heiftin virðist vera takmarkalaus.“