Sigfús Aðalsteinsson, fasteignasali og stofnandi Ísland - Þvert á flokka, hefur kært þrjá einstaklinga til lögreglu fyrir hatursorðræðu en hann sagði frá þessu í ræðu sinni sem hann hélt á laugardaginn á Austurvelli.

Samkvæmt RÚV hefur Sigfús ákveðið að kæra þau Ásu Berglindi Hjálmarsdóttur, þingmann Samfylkingarinnar, Grím Atlason, framkvæmdastjóra Geðhjálpar og Sigrúnu Þulu Jónsdóttur.

Ekki liggur nákvæmlega fyrir hvaða orð nákvæmlega þau eru kærð fyrir en Ása Berglind skrifaði meðal annars í pistli að fólkið sem kom saman á Austurvelli í byrjun mánaðar til að mótmæla stefnu ríkisstjórnarinnar í hælisleitendamálum væru rasistar og talaði fyrir kynþáttamisrétti.

Talsvert færri mættu á seinni mótmælin, sem voru haldin á laugardaginn, en þau sem haldin voru í byrjun júní en kröfur hópsins um nýja nálgun á stefnu stjórnvalda varðandi hælisleitendur voru þær sömu.