Runólfur Pálsson, forstjóri Landspítalans, hefur haft samband við úkraínsku lækninn Dariu Peremot eftir að hún greindi frá því í viðtali við Skessuhorn í síðustu viku að hún starfaði á veitingastað á Íslandi þrátt fyrir að vera sérmenntuð háls-, nef- og eyrnalæknir. Þetta kemur fram í nýrri frétt Skessuhorns.
Daria hefur búið hér á landi í fjögur ár og tekið próf við læknadeild Háskóla Íslands til að staðfesta þekkingu sína, en hefur engu að síður ekki fengið tækifæri til að starfa sem læknir.
Runólfur segir að viðtalið hafi haft áhrif á sig og orðið til þess að hann ákvað að kanna málið.
„Ég sá þetta viðtal og mér rann það til rifja af hverju hún hefði ekki fengið tækifæri til að nota menntun sína á Íslandi. Auðvitað vil ég reyna að skoða hennar mál en það er líka mjög mikilvægt að skoða þessi mál í heild sinni. Hvernig sé almennt haldið á málum gagnvart flóttafólki í hennar stöðu sem er með mjög dýrmæta menntun og reynslu. Það þarf að tryggja að það fái tækifæri.“
Ætlar að hitta hana
Forstjórinn hefur þegar haft samband við Dariu og hyggst hitta hana til að fara yfir hvaða svör hún hefur fengið við umsóknum um störf.
Hann segir það sláandi ef fólk er látið taka próf til að staðfesta hæfni sína en fái síðan ekki tækifæri til að afla sér þeirrar starfsreynslu sem þarf til að fá starfsleyfi.
„Við á Landspítalanum erum helsta menntastofnun landsins á þessu sviði og það þarf að fara ofan í saumana á þessu. Auðvitað eru margar hliðar á þessu. Prófið er eitt en það þarf að öðlast ákveðna klíníska færni og stundum er reynslutíminn of stuttur, til dæmis ef það eru tungumálaerfiðleikar eða mikill munur á hefðum og venjum í heilbrigðisþjónustu og hér og þar sem fólkið starfaði áður.“
Vill skoða málið betur
Runólfur bendir jafnframt á að Landspítalinn taki á móti stórum hópi læknanema og nýútskrifaðra lækna á hverju ári sem þurfi einnig starfsþjálfun.
Þeir hafi forgang, en hann segir að það megi ekki leiða til þess að fólk með verðmæta menntun og reynslu sitji eftir án tækifæra.
„Það þarf að gera okkur kleift að gera það. Þarna þarf að fara vel yfir málið og koma í veg fyrir að svona sé farið með fólk og dýrmæta menntun,“ segir Runólfur Pálsson.
