Sigríður Á. Andersen, fyrrverandi dómsmálaráðherra, hefur farið í svokallaða endurmörkun, með nýju útliti, síðan hún gekk úr Sjálfstæðisflokknum og bauð sig fram fyrir Miðflokkinn í fyrra.

Í gær kynnti hún til sögunnar nýja hárgreiðslu í hlaðvarpsþættinum Þjóðmálum hjá blaðamanninum Gísla Frey Valdórssyni, eiganda Þjóðmála, og Erni Arnarsyni, ritstjórnarfulltrúa Viðskiptablaðsins.

„Ég beið eftir að herrarnir myndu ávarpa permið,“ sagði Sigríður á Facebook. „Þeir þorðu það ekki.“

Í þættinum ræddu þau um „viðvaningshátt við fjárlagagerð og skattahækkanir, ummæli forsætisráðherra um kólnandi hagkerfi, gjafirnar sem Inga Sæland vill gefa en láta aðra borga fyrir, oddvitamál í borginni, yfirlæti í garð stuðningsmanna Miðflokksins, hvort það sé áhugavert að fjárfesta í sjávarútvegi og margt fleira.“

Þjóðmál er í samstarfi við yfirmenn ritstjórna á Morgunblaðinu, Viðskiptablaðinu og Vísi. Nýlega veittu Þjóðmál ýmsum forsprökkum viðskiptalífsins verðlaun. Þar á meðal fékk Þorsteinn Már Baldvinsson afhent málverk af sjálfum sér í heiðursverðlaun Þjóðmála.