Þorbjörg S. Gunnlaugsdóttir dómsmálaráðherra tók í gær við tillögum starfshóps að breytingu á lögum um nálgunarbann og brottvísun af heimili.

Verða tillögurnar og aðgerðir tengdar þeim kynntar á komandi vikum.

„Það er skýrt í mínum huga að ofsóknir eiga að hafa afleiðingar og það verður aldrei talið til mannréttinda að fá að ofsækja fólk, segir ráðherra og bætir því við að „þolendur eltihrella og þolendur ofbeldis í nánum samböndum eiga að finna fyrir öryggi, sér í lagi á eigin heimili.”

Þorbjörg nefnir að með þessum „aðgerðum sem kynntar verða og frumvarpi sem ég mun leggja fram á Alþingi stöndum við vörð um þolendur og gerum það sem í okkar valdi stendur til að tryggja öryggi þeirra.“

Kemur fram að litið verður til löggjafar sem og framkvæmdar á Norðurlöndunum hvað þennan málaflokk varðar.

Áðurnefndur starfshópur var skipaður þann 25. mars síðastliðinn og var falið að yfirfara gildandi lög um nálgunarbann og brottvísun af heimili, sem og framkvæmd þeirra ásamt því að leggja til breytingar í samræmi við þá yfirferð.

Segir ráðherra að sérstaklega hafi verið „til skoðunar hvort, og þá með hvaða hætti, hægt er að nýta ökklabönd við rafræna vöktun til að auka öryggi brotaþola.”

Við vinnu starfshópsins var sérstaklega horft til löggjafar sem og framkvæmdar á Norðurlöndunum og þeirrar þróunar sem þar hefur átt sér stað á sviði rafræns eftirlits með nálgunarbanni og brottvísun af heimili.

Starfshópurinn ásamt ráðherra. Þorbjörg S. Gunnlaugsdóttir, Kristín Alda Jónsdóttir, Drífa Kristín Sigurðardóttir, Erna Sif Jónsdóttir, Anna Barbara Andradóttir og Linda Dröfn Gunnarsdóttir.