Starfslok Péturs Péturssonar sem slökkviliðsstjóra Brunavarna Árnessýslu tengjast rannsókn á fjárreiðum slökkviliðsins. Þetta kemur fram í yfirlýsingu frá stjórn Brunavarna Árnessýslu en RÚV sagði frá málinu.

Undanfarna daga hefur verið greint frá því að samkomulag hefði náðst um starfslok Péturs, en ekki hafði áður verið upplýst um ástæður þeirra.

Samkvæmt yfirlýsingu stjórnar bárust upplýsingar við yfirferð á ákveðnum þáttum í starfsemi Brunavarna Árnessýslu sem stjórn taldi rétt að vísa til rannsóknar lögreglu. Málið snýr að fjárreiðum slökkviliðsins.

„Stjórn Brunavarna Árnessýslu lítur málið alvarlegum augum. Með hliðsjón af því að málið er nú komið til rannsóknar hjá lögreglu telur stjórn ekki rétt að tjá sig frekar um efni þess að svo stöddu,“ segir í yfirlýsingunni.

Þar er jafnframt áréttað að rannsóknin fari fram samkvæmt lögum og að réttur allra aðila verði virtur.

Í kjölfar starfsloka Péturs hefur Lárus Kristinn Guðmundsson, varaslökkviliðsstjóri, verið ráðinn tímabundið í starf slökkviliðsstjóra.

Stjórn Brunavarna Árnessýslu segir rekstur slökkviliðsins óbreyttan og að öll lögbundin þjónusta verði veitt með sama hætti og áður. Þá sé viðbragðsgeta slökkviliðsins óbreytt.

Starfsmenn Brunavarna Árnessýslu voru upplýstir um ástæður starfslokanna í bréfi sem sent var þeim í dag.