Í dag tilkynnti Árvakur að félagið hefði sett nýtt app í loftið en það heitir Mogginn og er ætlað að vera app-útgáfa af Morgunblaðinu. Að sögn Árvakurs mun þetta brjóta blað í miðlum frétta á Íslandi.

Í kjölfar þeirra frétta rifjar sagnfræðingurinn og varaborgarfulltrúinn Stefán Pálsson upp deilur sínar við Morgunblaðið fyrir mörgum árum síðan.

„Fyrir mörgum árum var ég í hópi sem stofnaði vefrit til að vera með gamanmál. Við tyggðum okkur netfangið Mogginn-punktur-com. Ekki leið á löngu þar til við fengum reiðilegt símtal frá Árvakri þar sem við vorum kallaðir á fund með einhverjum yfirmanni og lögfræðingi og okkur hótað öllu illu, dómsmálum og skaðabótakröfum. Morgunblaðið ætti Mogga-nafnið og þetta væri því gróft brot,“ skrifar Stefán á Facebook um deilurnar.

„Við bentum á að Árvakur væri vissulega með skráð vörumerkið Morgunblaðið, en allt öðru máli gilti um Mogga-heitið. Þetta taldi lögfræðingurinn engu máli skipta, þar sem blaðið ætti hefðarrétt á þessu gælunafni. Nema hvað að Morgunblaðið hafði alltaf tekið sig svo alvarlega að það notaði aldrei þetta Mogga-nafn. Eina dæmið sem lögfræðingar blaðsins gátu dregið fram var að um nokkurra ára skeið höfðu „Myndasögur Moggans“ birst á barnasíðum blaðsins. Það fannst okkur nú frekar rýr grunnur að hefðarrétti og veikt efni í dómsmál.“

Sagnfræðingurinn segir að hópurinn hafi ekki nennt að standa í þessu þjarki og hafi skipt um nafn. Það hafi þó ekki liðið margir dagar þar til að Morgunblaðið hafi tilkynnt um opnum „Moggabúðarinnar“ sem seldi ýmsan varning tengdan fyrirtækinu.

„Það virtist nokkuð augljóst að lögfræðideildin hafði gefið út fyrirskipun um að treysta eignarhald félagsins á Mogganafninu betur í sessi. Og núna er Mogginn ekki lengur feiminn við að kalla sig Mogga.“