Stein Olav Romslo býður sig fram í 4. sæti í prófkjöri Samfylkingarinnar fyrir borgarstjórnarkosningar í vor en hann greinir frá þessu í tilkynningu til fjölmiðla.

Þá hefur Dóra Björt Guðjónsdóttir, borgarfulltrúi Samfylkingarinnar, einnig greint frá því að hún muni sækjast eftir 3. - 4. sæti í prófkjörinu.

Í desember sigraði Stein ungliðaprófkjör Hallveigar, Ungs jafnaðarfólks í Reykjavík, ásamt Bjarnveigu Birtu Bjarnadóttur.

Stein er 32 ára stærðfræðikennari í Hagaskóla. Hann er með M.Sc. gráðu í stærðfræði og kennslufræði frá norska tækniháskólanum NTNU í Þrándheimi og með diplómu í íslensku sem annað mál frá Háskóla Íslands.

Síðustu ár hefur Stein Olav gegnt ýmsum hlutverkum innan Samfylkingarinnar, svo sem stjórnarsetu í Samfylkingarfélaginu í Reykjavík og í framkvæmdastjórn flokksins. Stein Olav er í dag ritari framkvæmdastjórnar Samfylkingarinnar. Hann gegndi einnig stöðu formanns íbúaráðs Vesturbæjar þangað til íbúaráðin voru lögð af síðasta vor.

„Sem kennari tek ég með mér dýrmæta reynslu og þekkingu úr skólakerfinu. Við verðum að taka betur og fyrr utan um börn og ungmenni, sérstaklega þau sem eru í viðkvæmri stöðu. Það er mitt helsta forgangsmál. Gott fyrsta skref væri að tryggja aðgengi að sálfræðingum innan veggja skólanna sem sinna lágþröskuldaþjónustu,“ er haft eftir Stein í tilkynningunni.

„Samfylkingin verður að taka alvöru forystu í menntamálum með raunhæfum aðgerðum og forgangsröðun fjármuna í þágu vellíðan barna.“