Héraðsdómur Reykjavíkur tók í gær fyrir mál tvíburabræðranna Elíasar og Jónasar Shamsudin og fjórtán annarra sakborninga. Stór hluti ákærunnar, sem upphaflega spannaði tíu ákæruliði á átta blaðsíðum, hefur nú verið felldur niður. Vísir sagði frá málinu.

Bræðurnir og þrír aðrir játuðu hins vegar sök á þeim ákæruliðum sem eftir stóðu. Saksóknari fór fram á 15 mánaða fangelsisdóm yfir þeim, en látið verður í hendur dómara hvort refsingin verði skilorðsbundin eða ekki.

Í ákærunni voru meðal annars tilgreind meint skjalafalsbrot, þjófnaðir á búnaði og tækjum, sem og fíkniefnabrot. Meðal annars var þeim gefið að sök að hafa flutt inn 377 grömm af kókaíni frá Dóminíska lýðveldinu og ræktað kannabis. Umfangsmesti ákæruliðurinn laut þó að meintum þjófnaði á svokölluðum Doka-plötum, metnum á 13 milljónir króna, sem áttu að hafa verið seldar fyrir um eina milljón.

Shamsudin-bræður hafa áður hlotið dóm. Í ársbyrjun voru þeir dæmdir í tveggja og hálfs árs fangelsi fyrir að hafa haft umráð yfir 2,9 kílóum af MDMA-kristöllum og 1.781 töflu af sama efni, sem að sögn hefði getað skilað allt að 25 þúsund neysluskömmtum. Þeir voru þá handteknir í Kópavogi eftir að lögreglan hafði fundið efnin og skipt þeim út fyrir gerviefni.

Það mál hefur verið áfrýjað til Landsréttar.