Eftir hallarbyltinguna hjá íslenskum sósíalistum er alls óvíst hvort staða pólitísks leiðtoga flokksins verði enn til, en ritari flokksins segir að fyrrum flokksmenn muni snúa aftur.

Hins vegar er staða pólitísks leiðtoga Sósíalistaflokksins í endurskoðun eftir að Sanna Magdalena Mörtudóttir sagði nei við starfinu, en ljóst er að tugir hafa sagt sig úr flokknum í kjölfar skrautlegs aðalfundar.

Í spjallhópi Sósíalistaflokksins á Facebook - Rauða þræðinum - er mikið um yfirlýsingar fólks sem hefur segist hafa sagt sig úr flokknum; eða hyggist gera það í kjölfar áðurnefnds aðalfundar flokksins um síðustu helgi þar sem listi til höfuðs ráðandi öflum og þar með Sönnu Magdalenu Mörtudóttur borgarfulltrúa náði kjöri.

Og Karl Héðinn Kristjánsson ritari framkvæmdastjórnar Sósíalistaflokksins staðfestir þetta í samtali við fréttastofu RÚV:

„Ég held það séu 30-40 frá aðalfundi. Þetta er kannski skiljanlegt og eðlilegt þegar átök eru og ágreiningur um framtíð flokksins,“ segir Karl Héðinn sem segir einnig að í hópi þeirra sem hafa sagt sig úr flokknum sé fólk sem hafi starfað lengi með honum og sinnt ýmsum ábyrgðarstörfum.

„En aftur á móti þá hafa, vegna óánægju með óeðlileg vinnubrögð og slæma menningu, á síðustu fjórum árum hafa hátt í þúsund félagar sagt sig úr Sósíalistaflokknum. Við höfum fengið mörg skilaboð um að fólk sé tilbúið að ganga aftur til liðs við okkur.“

Karl Héðinn er spurður hvaða ástæður það séu fyrir því að fólk hefur verið að segja sig úr flokknum?

„Það telur að þetta hafi verið óeðlilegur aðalfundur. En við vísum því á bug,“ sagði hann.

Á aðalfundinum sögufræga var Sanna Magdalena kjörin pólitískur leiðtogi flokksins - en hún ákvað hins vegar að afþakka það hlutverk. Sanna ætlar að halda áfram störfum sem borgarfulltrúi fyrir flokkinn; ætlar ekki að skrá sig úr honum eins og sakir standa.

Að lokum segir Karl Héðinn að hlutverk pólitísks leiðtoga sé til endurskoðunar, og svo er hann svo spurður hvort það hlutverk verði hugsanlega ekki lengur til?

„Það er mjög líklegt.“