Tveir voru handteknir í aðgerðum lögreglu í Laugardalnum og Kópavogi í gær en þetta kemur fram í tilkynningu frá lögreglunni á Norðurlandi eystra.

„Í samvinnu við önnur lögregluembætti vinnur lögreglan á Norðurlandi eystra enn að rannsókn á máli er varðar skipulagða brotastarfsemi. Fyrstu aðgerðir í málinu voru þann 18. júní síðastliðinn en síðan þá er búið að fara í húsleitir á þremur stöðum,“ segir í tilkynningunni.

Eins og Mannlíf greindi frá í gær framkvæmdu lögreglumenn ítarlega leit í bílskúr sem stóð við húsið þar sem þeir fóru í gegnum málningafötur og ýmsar hirslur. Þá leituðu lögreglumenn einnig í málmpóstkassa sem var staðsettur við útidyrahurðina.

„Í gær fór lögreglan á höfuðborgarsvæðinu ásamt sérsveit Ríkislögreglustjóra í húsleitir á tveimur stöðum. Annars vegar í Laugardalnum í Reykjavík eins og fram hefur komið í fréttum og hins vegar í Kópavogi. Aðgerðirnar voru framkvæmdar sem liður í rannsókn lögreglunnar á Norðurlandi eystra og að undangengnum úrskurðum frá Héraðsdómi Norðurlands eystra.“

Samkvæmt lögreglu sitja nú fimm í gæsluvarðhaldi vegna málanna og verður lagt mat í dag á hvort farið verður fram á gæsluvarðhald yfir þeim sjötta.

Með þessum aðgerðum hefur lögreglan framkvæmt sex húsleitir víðsvegar á landinu en samkvæmt lögreglu varðar þetta mál skipulagða brotastarfsemi.