Sigfús Aðalsteinsson fasteignasali dró sér hundruð þúsunda króna þegar hann var forstöðumaður leikskólans Klettaborgar í Reykjavík en greint er frá þessu í Heimildinni.

Sigfús hefur verið mikið í sviðsljósinu undanfarnar vikur eftir að hafa stofnað Facebook-hópinn Ísland - þvert á flokka, sem hefur gagnrýnt stefnu stjórnvalda þegar kemur að hælisleitendum og innflytjendum. Lögbrot hans áttu sér stað á 10. áratug síðustu aldar en í samtali við Heimildina segist hann ekki viss hvort lögbrotið sé alvarlegt. „Ég hugsa að það sé brot. Hvort að það er alvarlegt, ég ætla nú ekki að fara út í þessa sögu en ég er með önnur markmið í dag. Þarna eru þrjátíu og eitthvað ár síðan þetta gerðist,“ sagði hann við Heimildina en hann hefur kallað eftir því að innflytjendur sem gerist sekir um alvarleg brot á Íslandi verði sendir úr landi.

Sigfús játaði allt þegar málið kom upp á síðustu öld og sagði starfi sínu lausu og var málið leyst í sátt milli borgarinnar og fasteignasalans.

Hópur Sigfúsar mun halda mótmælafund á Austurvelli á morgun. „Við erum að halda samstöðufund með íslensku þjóðinni vegna stefnu stjórnvalda í málefnum hælisleitenda og glæpamanna á Íslandi,“ sagði Sigfús um fundinn á laugardag. „Við erum afar ósáttur hópur með þá stefnu og hvernig ríkisstjórnin vinnur þau mál.“

Hann telur hópinn sem hann fer fyrir vera svolítinn þverskurður af þjóðinni.