Lögreglan í Þýskalandi handtók í dag 20 ára gamlan mann sem er grunaður um að hafa valdið hættuástandi um borð í hraðlest með því að kveikja í flugeldum og bera á sér hnífa. Alls slösuðust 12 farþegar lítillega í atvikinu.

Atvikið átti sér stað seint á fimmtudagskvöld um borð í lest á leið til Frankfurt í vesturhluta landsins. Um 180 farþegar voru um borð og voru þeir allir fluttir frá lestinni í kjölfarið.

Samkvæmt upplýsingum lögreglu tókst farþegum að yfirbuga manninn og læsa hann inni á salerni eftir að hann hafði kveikt í flugeldum. Hann var handtekinn á vettvangi og reyndist vera vopnaður tveimur hnífum.

Málið hefur verið fært til lögregludeildar í Bonn sem sérhæfir sig í rannsóknum á pólitískt tengdum brotum. Lögregla segir að ekki sé hægt að útiloka að pólitískar hvatir hafa verið ástæða árásarinnar, að svo stöddu.

Þýskir fjölmiðlar hafa greint frá því að maðurinn, sem er frá borginni Aachen, hafi hótað árás og sagst ætla að bana fólki. Þá er einnig haft eftir vitnum að hann hafi kastað flugeldum sem innihéldu plastkúlur.

Einn hinna slösuðu var fluttur á sjúkrahús til aðhlynningar en útskrifaður skömmu síðar. Lögregla framkvæmdi leit í lestinni að hættulegum hlutum, en ekkert fannst.