Fyrrverandi prinsinn Andrew eyddi stórum hluta 66 ára afmælis síns í haldi lögreglu. Hann var handtekinn grunaður um misferli í opinberu starfi, síðar sleppt en sætir áframhaldandi rannsókn, en í kjölfarið hefur komið fram að bresk stjórnvöld hyggist íhuga að svipta hann sæti í erfðaröðinni þegar öllum lögreglurannsóknum lýkur.

Andrew er nú áttundi í röðinni til krúnunnar, en ef öll samveldisríkin sem Karl III er þjóðhöfðingi yfir samþykkja, gæti þingið sett lög sem myndu afnema þetta síðasta formlega tákn konungsstöðu hans. Karl konungur hefur þegar svipt bróður sinn titlum og heiðursnafnbótum, en það hefur ekki dugað til að slá á reiði almennings vegna tengsla Andrews við hinn dæmda kynferðisbrotamann Jeffrey Epstein.

Birting milljóna skjala, svokallaðra Epstein-skjala, af hálfu bandaríska dómsmálaráðuneytisins hefur varpað nýju ljósi á vináttu Andrews og Epstein, sem og tengsl fyrrverandi eiginkonu hans, Söruh Ferguson við níðinginn. Á bak við luktar dyr stendur Windsor-ættin frammi fyrir einni alvarlegustu krísu í sögu sinni.

Óstöðugur og í afneitun

Sérfræðingar í málefnum konungsfjölskyldunnar segja að Andrew eigi erfitt með að sætta sig við fall sitt. Fyrrverandi fréttaritari BBC, Jennie Bond, segir hann lifa í stöðugum ótta um hvað komi næst í ljós. Aðrir heimildarmenn segja hann hafa neitað að yfirgefa Royal Lodge í Windsor og verið í afneitun gagnvart raunverulegri stöðu sinni.

Andrew er sagður hafa misst tengsl við raunveruleikann og halda enn í formlega ávarpið „Sir“ gagnvart starfsfólki, þrátt fyrir að hann hafi í raun enga eigin starfsmenn lengur. Heimildir herma einnig að hann sé æfur yfir því að þurfa að aflétta áformum um ríkisútför sína.

„[Hann] sá fyrir sér stórfenglega athöfn í kapellu heilags Georgs í Windsor, sem yrði sjónvarpað til syrgjandi þjóðar, en áætlanir hans hafa verið settar í tætarann.“

Karl konungur sleginn

Karl konungur er sagður „sundurlaus af sorg“ yfir handtöku bróður síns. Samkvæmt The Times hafði hann grun um að frekari upplýsingar um tengsl Andrews við Epstein myndu koma fram, en hafi tekið frásögn bróður síns trúanlega af tryggð. Nú hyggst hann þó styðja lögreglu að fullu í rannsóknum sínum, að sögn heimilda innan hallarinnar.

Dætur Andrews í krísu

Dætur Andrews, Berta Dís prinsessa og Evgenía prinsessa, eru sagðar eiga mjög erfitt með ástandið. Í Epstein-skjölunum koma fram tölvupóstar sem gefa til kynna að Beta Dís hafi, sem ung kona, verið hluti af félagslegum tengslum foreldra sinna við Epstein. Sérfræðingar segja slíkar upplýsingar „grimmilegar“ og afar þungbærar fyrir dótturina.

Heimildir herma að Beta Dís sé á barmi taugaáfalls og glími við umfang ásakana á hendur föður hennar. Evgenía á hins vegar að hafa slitið samskiptum við hann, meðal annars í ljósi starfa sinna með samtökum gegn mansali.

Ferguson í felum

Sarah Ferguson hefur haldið sig fjarri sviðsljósinu eftir að málið blossaði upp. Hún dvaldi um tíma á lúxus-heilsubótarmiðstöð í Sviss og er nú sögð vera í felum hjá vinum í Bretlandi, miður sín og sígrátandi. Höfundurinn Andrew Lownie telur að hún þurfi að bera vitni fyrir bandaríska þinginu um það sem hún viti um Epstein.

Þögn Harrýs og spenna hjá Vilhjálmi

Harrý prins hefur enn ekki tjáð sig opinberlega, þrátt fyrir að hafa áður gagnrýnt meðferð stofnunarinnar á máli Andrews í ævisögu sinni Spare. Heimildir segja ólíklegt að hann taki þátt í umræðunni nú.

Á sama tíma birtust Vilhjálmur krónprins og Katrín prinsessa opinberlega í fyrsta sinn eftir handtökuna á Bafta-hátíðinni. Líkamstjáningarsérfræðingar telja merki um bælda spennu hafa verið greinileg, og Vilhjálmur viðurkenndi sjálfur að hann væri ekki í „rólegu hugarástandi“.