Þingmaður Repúplíkana í Tennessee hefur lagt fram frumvarp sem myndi skilgreina þungunarrof sem refsivert manndráp. Yrði frumvarpið að lögum gæti það haft í för með sér að konur sem fara í þungunarrof sæti ákæru fyrir alvarleg afbrot og í ýtrustu tilfellum jafnvel dauðarefsingu.
Í Tennessee er þegar í gildi eitt strangasta bann við þungunarrofi í Bandaríkjunum, en samkvæmt núgildandi lögum beinast refsingar eingöngu að læknum sem framkvæma aðgerðina. Jody Barrett, þingmaður Repúblikanaflokksins og fulltrúi kjördæmisins Dickson, vill ganga mun lengra. Hann hefur lagt fram frumvarp sem myndi gera mæður sjálfar refsiábyrgar, annaðhvort fyrir líkamsárás eða manndráp, ef þær gangast undir þungunarrof.
Barrett segir að markmið frumvarpsins sé „jöfn vernd fyrir lögum“.
„Morð er morð, hvort sem um er að ræða manneskju sem er fædd eða manneskju í móðurkviði,“ sagði hann.
Þegar hann var spurður um gagnrýni þess efnis að frumvarpið beinist sérstaklega gegn konum hafnaði hann því.
„Ég tel að það sé aðeins orðræðupunktur að þetta snúist um að ráðast á mæður. Við erum ekki að miða á mæður. Við erum að miða á ófædd börn og reyna að vernda þau og veita þeim sömu lagavernd og þú og ég njótum,“ sagði Barrett.
Frumvarpið hefur vakið mikla andstöðu meðal Demókrata, sem vara við því að orðalag þess geti opnað á að dauðarefsing verði beitt. Charlane Oliver, öldungadeildarþingmaður Demókrata frá Nashville, sagði: „Við erum með Repúblikana í þessari byggingu sem eru að ýta undir að konur verði teknar af lífi fyrir það eitt að fara í þungunarrof.“
Orðin „dauðarefsing“ koma ekki beinlínis fyrir í texta frumvarpsins. Þar er þó kveðið á um að þungunarrof skuli lúta „sömu forsendum, vörnum, réttlætingum, refsiákvæðum og náðun“ og ef um væri að ræða líkamsárás eða manndráp á einstaklingi sem fæddur er á lífi.
Barrett viðurkennir að dauðarefsing sé fræðilega möguleg samkvæmt frumvarpinu, en segir hana afar ólíklega. Hann bendir á að frá því dauðarefsing var tekin upp að nýju í Tennessee árið 1977 hafi færri en 200 manns verið dæmdir til dauða og aðeins 16 teknir af lífi, engin þeirra konur.
Frumvarpið gerir þó undantekningar, meðal annars þegar líf móður er í hættu og í tilvikum sjálfkrafa fósturláts.
Enn sem komið er hefur breytingartillagan ekki verið formlega lögð fram á þingi Tennessee og er því ekki að finna í opinberum gagnagrunnum þingsins. Barrett hefur hins vegar afhent fjölmiðlinum WTVF drög að tillögunni og mögulegt er að hún verði tekin fyrir í neðri deild þingsins strax í næstu viku. Í öldungadeild ríkisins er Mark Pody skráður stuðningsmaður breytingarinnar.
Demókratar segja málið of alvarlegt til að gera lítið úr því. Aftyn Behn sagði: „Við ættum að vera mjög hrædd. Þetta er afar ógnvekjandi skref sem ríkið er að stíga.“ Þá sagði Gloria Johnson: „Þetta er það sem þessi þingheimur er að gera konum og fjölskyldum.“
Barrett heldur því hins vegar fram að frumvarpið endurspegli grundvallargildi:
„Hvert líf hefur gildi,“ sagði hann.
