Réttarhöld hafin í Covid-máli Júlíusar – Sveinn skipstjóri situr í réttarsalnum

Sveinn Geir Arn­ars­son, skip­stjóri frysti­tog­ar­ans Júíusar Geir­munds­sonar ÍS, er mættur fyrir dóm á Ísafirði þar sem fram fara sjó­próf vegna frægs Covid-túrs tog­ar­ans. Skipp­er­inn er því mættur í sjó­rétt­inn til að fylgj­ast með vitn­is­burðum und­ir­manna sinna. Rétt­ar­haldið hófst snemma í morgun fyrir Hér­aðs­dómi Vest­fjarða og þar hafa skip­verjarnir einn af öðrum verið kall­aðir til skýrslu­töku. Þar mun sótt­varn­ar­læknir umdæm­s­ins, Súsanna Björg Ást­valds­dóttir, einnig vera kölluð til en hún opn­aði á umræð­una alla um að útgerðin brást skyldum sínum í túrnum.

Þar er líka mættur útgerð­ar­stjór­inn Valdimar Stein­þórs­son en hann hefur verið afar ósáttur við afbökun fjöl­miðla á því sem átti sér stað í túrnum. Eftir því sem Mannlíf kemst næst er Einar Valur Krist­jáns­son, fram­kvæmda­stjóri útgerð­ar­innar, hvergi sjá­an­legur en frétta­menn frá bæði RÚV og Stöð 2 eru á staðnum. Bæði fram­kvæmda­stjór­inn og skip­stjór­inn hafa lýst því yfir að fyrir dómnum muni þeir hvor­ugir bera vitni þar sem þeir hafa stöðu sak­born­inga í lög­reglu­rann­sókn vegna túrs­ins.

Fyrir dómnum liggur sjó­dag­bók tog­ar­ans frá umræddum Covid-túr en lengi vel neit­uðu lög­menn skip­stjór­ans og útgerð­ar­innar að afhenda hana sem máls­gagn í skjóli per­sónu­verndar. Síðar kom í ljós að til­tölu­legar tak­mark­aðar per­sónu­upp­lýs­ingar koma fram í bók­inni sem tengj­ast veik­indum skips­verj­anna.

Áhöfn tog­ar­ans Júlíusar Geir­munds­sonar, sendi bréf til útgerð­ar­innar þar sem þeir lýstu yfir van­trausti á Svein skip­stjóra. Þar var þess kraf­ist að Sveinn láti af störfum. Nærri helm­ingur áhafnar fyrsti­tog­ar­ans Júlíusar Geir­munds­sonar frá Ísafirði, hefur risið upp gegn skip­stjóra sínum sem stýrði hinum fræga Covid-túr skips­ins sem Mannlíf greindi fyrst frá. Það var síðan ekki fyrr en Mannlíf greindi frá því að útgerðin hefið ítrekað hundsað til­mæli sótt­varn­ar­læknis umdæm­s­ins sem fjöl­miðlar vökn­uðu til lífs­ins um alvar­leika máls­ins.

Hann hefur sjálfur neitað að mæta í sjó­próf og var það kornið sem fyllti mæl­inn hjá skip­verj­unum sam­kvæmt heim­ildum Mannlífs.

Áður hafa útgerðin og skip­stjór­inn þrá­ast við að afhenda sjó­dag­bók tog­ar­ans og var deilt um afhend­ingu hennar fyrir Hér­aðs­dómi Reykja­ness fyrir helgi. Þar var einnig tek­ist á um fyr­ir­huguð sjó­próf og þar full­yrtu tví­menn­ing­arnir, eða lög­maður þeirra nánar til­tekið, að þeir myndu ekki taka þátt í vitna­leiðslum sjó­próf­anna. Aftur á móti var dag­bókin afhent dóm­ara fyrir rétt­inum sem nú fær það hlut­verk að meta hvort bókin verði afhent stétt­ar­fé­lögum sjó­manna sem kærðu útgerð­ina og skip­stjór­ann fyrir slæma með­ferð skip­verja í marg­frægum túr hans á dög­unum.

Stétt­ar­fé­lög áhafn­ar­innar á frysti­tog­ar­anum Júlíusi Geir­munds­syni tóku höndum saman og kærðu útgerð­ina til lög­reglu. Tilefnið er frægur Covid-túr tog­ar­ans þar sem útlit er fyrir að veikum sjó­mönnum hafi verið haldið á sjó svo vikum skipti og skikk­aðir til að vinna. Þá hefur útgerðin orðið upp­vís að því að hlýða ekki sótt­varn­ar­lækni á Vest­firði sem gaf ítrekuð til­mæli þess efnis að tog­ar­anum yrði stýrt í land svo áhöfnin kæm­ist í sýna­tökur. Það var ekki gert fyrr en þremur vikum eftir brott­för.

Sveinn sagð­ist ekki hafa neitt um málið að segja þegar blaða­maður spurði hann út í van­trausts­yf­ir­lýs­ing­una fyrr í dag en hann hefur ítrekað neitað að tjá sig um málið þrátt fyrir ítrek­aðar til­raunir. Hann hefur sjálfur frá­beðið sér sýnd­ar­rétt­ar­höld vegna túrs­ins sem ætluð séu til þess eins að smána sig. Hann seg­ist þó ekki ætla að skor­ast undan ábyrgð í mál­inu.