Freyja Egilsdóttir Mogensen verður jarðsungin frá Selfosskirkju næstkomandi föstudag. Hún var myrt með hrottalegum hætti í Danmörku 2. febrúar síðastliðinn.
Freyja var 43 stúlka frá Selfossi sem elskaði flatkökur og íslenska náttúru. Síðustu vikur hennar hér á jörðu saknaði hún heimalandsins og mátti skynja að hana langaði heim. Freyja starfaði á dvalarheimili aldraðra í Odder, á austanverðu Jótlandi.
Sjá einnig: Sorgarsaga Freyju -„Erum í áfalli“-Stúlkan frá Selfossi elskaði flatkökur og íslenska náttúru
Freyja ólst upp á Selfossi. Hún flutti til Árósa í Danmörku árið 1999 og bjó þar fram í andlátið. Flestir ættingjar hennar búa á Íslandi en systir hennar býr í Danmörku. Freyja var þýsk í móðurættina en átti íslenskan föður, Egil Egilsson, frá Króki í Biskupstungum, sem lést árið 2019. Hún talaði því reiprennandi þýsku. Áður en hún flutti til Danmerkur bjó Freyja í Frakklandi og Austurríki.
Eins og gefur að skilja var fjölskylda Freyju hér á landi yfirbuguð af sorg vegna tíðindanna af fráfalli Freyju. Hún á þrjár systur: Dísu Maríu, Ásthildi og Sólrúnu. Móðir þeirra er Bóthildur Hauksdóttir en faðir þeirra, Egill Egilsson, lést 21. ágúst 2019.
Freyja lætur eftir sig þrjú börn: Alex fæddur 1993, Lúkas fæddur 2001 og Emma fædd 2015. Útför Freyju hér á landi fer fram síðar að sögn systranna þriggja sem fara hlýjum orðum um Freyju. Freyja heitin var yngst þeirra systra.
„Á erfiðum tímum er gott að finna fyrir hlýhug og umhyggju frá fjölskyldu, vinum og nærumhverfi. Við þökkum því góða fólki sem hugsaði til okkar og gaf okkur styrk. Það var mikið fjör og gleði að fá kornabarn í hópinn þegar við hinar systurnar vorum komnar, eða nánast komnar, á unglingsaldur. Hún var einstaklega ljúft barn og mikill gleðigjafi sem gerði alla daga betri,“ segja þær Dísa María, Ásthildur og Sólrún. Og þær bæta við:„Freyja var lífsglöð, hún gladdi fólk með nærveru sinni og fann til með því fólki sem átti erfitt. Hún var mjög listræn, elskaði tónlist og málaði litskrúðugar myndir sjálfri sér og öðrum til ánægju. Við minnumst Freyju umfram allt fyrir hjartahlýju og jákvæðni til lífsins. Freyju verður sárt saknað og hún ávallt elskuð.“
Ríflega fimmtugur sambýlismaður Freyju, Flemming Mogensen, játaði fyrir dönskum dómstólum að hafa orðið henni að bana.
Sjá einnig: Þetta er maðurinn sem myrti Freyju – Leiddur fyrir dómara með brotin gleraugu
Frænka morðingjans, sambýlismannsins sem játað hefur á sig morð Freyju, Camilla Diana Mogensen, segir fjölskylduna í gífurlegu áfalli eftir hinn sorglega atburð. „Við erum, öll fjölskyldan, í mjög miklu áfalli,“ sagði Camilla í samtali við Mannlíf.
Skömmu fyrir andlátið birti Freyja mjög fallegar myndir af Íslandi þar sem hún sagðist sakna landsins og að hana langaði heim. Aðeins eru þrjár vikur síðan. Í færslu á Instragram birti hún fallegar Íslandsmyndir með eftirfarandi skilaboðum.
„Ég elska líf mitt í Danmörku en ég sakna virkilega heimalandsins míns, fjölskyldu og vina. Dönsk náttúra er róandi en sú íslenska svo kraftmikil,“ sagði Freyja sem hafði sterka tengingu við Ísland og heimabæ sinn á Selfossi.
Athugasemdir