Anna Kristjáns hraunar yfir heimalandið: „Á Íslandi er veðrið nánast alltaf vont“

Anna Krist­jáns­dóttir skrifar um veðrið og nýjasta ráð­herra Sví­þjóðar í bráð­skemmti­legum pistli sínum á Facebook í dag. Anna hefur haldið úti færslum á Facebook í 842 daga en þá skrifar hún á Tenerife, þar sem hún býr.

Í nýjasta pistli sínum talar hún um mun­inn á veðr­inu á Íslandi og á Tenerife.

„Ég heyrði eitt sinn ein­hvern Íslend­ing kvarta yfir veðr­inu á Tenerife. Það væri hund­leið­in­legt að vera þar sem alltaf væri sama veðrið, eitt­hvað annað en á Íslandi þar sem væri fjöl­breytt veð­ur­far. Ég er þessu ósam­mála. Það er vissu­lega oft­ast gott veður á Tenerife, en samt er veðrið mjög fjöl­breytt,“ skrifar Anna í byrjun pistils­ins. Og hún heldur áfram.

„Á Íslandi er veðrið vont, það er marg­breyti­legt en nán­ast alltaf vont. Þar ríkir kuldi og þar ríkir bleyta eða snjó­koma. Ef að kemur fyrir að að sést til sólar er venju­lega svo kalt að best er að halda sig inn­an­dyra og kall­ast slíkt glugga­veður. Stundum verður veðrið veru­lega vont. Það kall­ast bræla ef er til sjós, ann­ars rok og rign­ing ef er á þurru landi. Við skulum ekk­ert nefna ísing­ar­veðrin, stundum kölluð mann­dráps­veður. En það er sjaldn­ast gott veður á Íslandi. Ég minn­ist þó eins dags í byrjun ágúst, senni­lega um 2006 sem hit­inn fór í 25,4°C í Reykja­vík og var kallað hita­met enda hita­bylgja í gangi að mati eyja­skeggja á Íslandi.“

En hvernig er þá veðrið á Tenerife?

„Á Tenerife er veðrið gott, það er marg­breyti­legt en nán­ast alltaf gott. Þar ríkir hlýja og þar ríkir sól­skin og bað­veður. Þá sjaldan sem ský dregur fyrir sólu er kvartað, en það kemur samt fyrir og rign­ingin á það til að koma um hávet­ur­inn. Verst af öllu eru samt Calima veðrin þegar sand­kornin í Sahara eyði­mörk­inni leggj­ast í ferða­lag á haf út og yfir okkur. Ef þau eru mild er það gott, en stundum verða þau slæm og þá er ekki gaman að vera á Tenerife. Ég minn­ist febr­ú­ar­dags árið 2020 þegar veðrið var svo slæmt að ferj­urnar rák­ust á hverja aðra í höfn­inni í Los Cristianos þar sem ekki sást handa minna skil, hvað þá á milli fingra skip­stjórn­ar­manna á ferj­unum. Allt flug lá niðri, en Bret­arnir mínir mættu samt á bar­inn og drukku sand­bland­aðan bjór­inn sinn.Í ágúst síð­ast­liðnum varð hita­bylgja, fór upp í 45°C á flug­vell­inum en var ein­ungis 32°C á sama tíma í Los Cristianos í fjórtán kíló­metra fjar­lægð. En ég hefi líka séð næt­ur­hit­ann fara niður í 13°C í jan­úar. Veðrið er svo sann­ar­lega marg­breyti­legt á Tenerife, en öfugt við Ísland, nán­ast alltaf gott. Þess vegna kýs ég að búa á Tenerife, en ekki á Íslandi því hér er ynd­is­legt að vera.“Í lok færsl­unnar drepur Anna laus­lega á nýja skóla­mála­ráð­herra Sví­þjóðar, trans­kon­una Linu Axelsson Kihlblom.„Ég hefi fengið nokkrar fyr­ir­spurnir síð­ustu dag­ana um nýja skóla­mála­ráð­herr­ann í Svíþjóð sem er trans­kona. Ég við­ur­kenni skömm mína. Ég man ekk­ert eftir henni. Það er auð­vitað mín skömm því hún var með­limur í För­en­ingen Benjamin þegar ég var virk þar og for­maður félags­ins í tvö ár. Lina Axelsson Kihlblom er fædd 24. júní 1970, fór í gegnum ferlið í Svíþjóð á svip­uðum tíma og ég, en fór í aðgerð til leið­rétt­ingar á kyni í ágúst 1995, þ.e. fjórum mán­uðum á eftir mér. Flott kona. Svo mörg voru þau orð.“