Samkvæmt dagvöruvísitölu ASÍ hækkaði verðlag á dagvöru um 0,58% í maí. Nemur árshækkun um 4,5% og er þetta fjórði mánuðurinn í röð sem vísitalan hækkar um meira en hálft prósent á milli mánaða. Sá hækkunartaktur jafngildir um 6% árshækkun á matvörum.
Megindrifkraftar verðhækkana í maí samkvæmt ASÍ voru hækkanir á mjólkurvörum í öllum verslunum, og einnig almennar hækkanir í verslunum Samkaupa.
Þá hefur súkkulaðiverð hækkað jafnt og þétt á Íslandi á undanförnum árum. Frá janúar 2024 hefur verð á vörum frá Nóa Síríus hækkað um 37%, frá Freyju um 30% og frá Góu um 14% miðað við verð í Bónus og Krónunni.
Þrátt fyrir að heimsmarkaðsverð á kakói hafi lítið breyst síðasta hálfa árið mælast enn hækkanir á súkkulaðiverði hér á landi og hækkanirnar vekja athygli fyrir þær sakir að þær haldast í hendur við betri afkomu sælgætisframleiðenda; sem dæmi jókst rekstrarhagnaður Nóa Síríus um helming í fyrra og hagnaður fyrirtækisins meira en þrefaldast.
Kaffi hefur líka hækkað í verði síðustu misserin samhliða hækkunum á heimsmarkaðsverði og í maí höfðu kaffibaunir hækkað í Bónus og Krónunni um 17% að meðaltali milli ára.
Prís er áfram ódýrasta verslunin í reglulegu eftirliti verðlagseftirlitsins, og hefur verð í versluninni verið um 4% undir verði Bónus að meðaltali frá opnun, og er enn.
Athugasemdir