Bogi Þór Siguroddsson, einn stærsti hluthafi Ölgerðarinnar, segist taka umfjöllun fréttaskýringaþáttarins Kveiks um viðskiptahætti fyrirtækisins mjög alvarlega. Hann leggur áherslu á að fyrirtæki eigi ekki aðeins að fylgja lögum heldur einnig starfa í anda þeirra.
RÚV greinir frá þessu og leitaði viðbragða Boga vegna rannsóknar Samkeppniseftirlitsins á Ölgerðinni og meintrar misnotkunar fyrirtækisins á markaðsráðandi stöðu.
„Auðvitað tek ég umfjöllunina um samninga og sölufyrirkomulag Ölgerðarinnar mjög alvarlega. Mér finnst mikilvægt að rannsókn Samkeppniseftirlitsins fái að hafa sinn gang en get í raun fátt annað sagt á þessum tímapunkti,“ segir Bogi í svari til RÚV.
Bogi hefur lengi verið áberandi í íslensku viðskiptalífi og var meðal annars forstjóri Húsasmiðjunnar. Árið 2002 gaf hann út bókina Fjandsamleg yfirtaka – átakasaga úr íslensku atvinnulífi, þar sem hann fjallaði um átök í kringum fyrirtækið og lagði áherslu á mikilvægi siðferðis í viðskiptum.
Í samtali við RÚV segir Bogi afstöðu sína óbreytta. Fyrirtæki eigi að starfa innan ramma laganna og í anda þeirra. Heilbrigð samkeppni, sanngirni og ábyrgð séu grundvallaratriði.
Bogi segist jafnframt, sem stór hluthafi, leggja ríka áherslu á að Ölgerðin njóti trausts og virðingar. Hann muni styðja þær breytingar sem kunni að reynast nauðsynlegar til að tryggja að starfshættir fyrirtækisins standist þær kröfur sem gera verði til ábyrgra fyrirtækja.
Athugasemdir