Úkraína gæti keypt allt að 150 Gripen orrustuþotur, sagði Ulf Kristersson forsætisráðherra Svíþjóðar, í dag eftir undirritun viljayfirlýsingar um aukið samstarf á sviði flugs milli landanna tveggja.
Kristersson sagði á blaðamannafundi ásamt Volodymyr Zelensky, forseta Úkraínu, að viljayfirlýsingin myndi skapa forsendur fyrir „mjög stórum varnariðnaðarsamningi“.
„Líklega einhvers staðar á bilinu 100 til 150 orrustuþotur af gerðinni Gripen E sem nú eru að fara í framleiðslu,“ sagði hann og bætti við að samningurinn gæti haft 10 til 15 ára tímaramma.
Kristersson sagði að undirritunin væri „upphafið að langri ferð“.
Kristersson sagði að hann ætti von á að fyrstu þoturnar gætu verið afhentar Úkraínu „innan þriggja ára“ ef allt gengi samkvæmt áætlun.
Í samtali við AFP tók varnarmálaráðherra Svíþjóðar, Pål Jonson, fram að „það séu mörg smáatriði sem þarf að vinna úr “varðandi aukna framleiðslu, þjálfun og fjármögnun.
„En ef viljinn er til staðar, þá finnum við leiðina saman,“ sagði Jonson.
Kristersson sagði við blaðamenn að „mikilvægt skref“ varðandi fjármögnun gæti verið tekið „jafnvel strax á morgun“, þegar rætt yrði í Evrópuráðinu hvort nota mætti frystar rússneskar eignir til stuðnings Úkraínu.
Forsætisráðherrann tók fram að bæði hann og Zelensky myndu fljúga til Brussel til að taka þátt í viðræðum.
Micael Johansson, forstjóri Saab, lagði áherslu á að „finna þyrfti fjárhagslega lausn“, en bætti við að fyrirtækið gæti byrjað að huga að því hvernig mætti auka framleiðsluna.
„Við höfum engan samning í dag, en þetta er mjög mikilvægt fyrsta skref,“ sagði hann við AFP.
Athugasemdir