Maður í New Smyrna Beach í Flórída var handtekinn á miðvikudagskvöld eftir að hafa hótað lögreglumönnum, flúið undan þeim og bitið lögregluhund. Atvikið stóð yfir í um þrjár klukkustundir.
Samkvæmt lögreglustjóranum í Volusia-sýslu var maðurinn, hinn 37 ára Bradford Kanan, eftirlýstur. Lögregla fann hann við heimili við South Atlantic Avenue eftir að tilkynning barst um grunsamlegan mann.
Kanan sat í hvítum Toyota-bíl og neitaði að hlýða fyrirmælum lögreglu um að stíga út. Hann sagðist vera vopnaður og hótaði lögreglumönnum. Á upptöku úr búkmyndavél heyrist hann jafnframt segja að hann ætli ekki í fangelsi og að lögreglumenn yrðu að drepa hann.
Lögregla reyndi að róa Kanan en hann ók á brott og hélt að bátarampi við Apollo Beach í Canaveral National Seashore. Þar yfirgaf hann bifreiðina og flúði inn í þéttan gróður við strandlengjuna.
Mikið lið var kallað út til leitarinnar, þar á meðal lögreglumenn með hunda, drónasveitir og þyrla.
Skömmu fyrir klukkan níu um kvöldið fann lögregluhundur Kanan þar sem hann skreið í gegnum pálmagróður. Við handtökuna sló Kanan hundinn og beit hann í háls og eyra en hundinn sakaði ekki.
Ekkert vopn fannst á Kanan. Hann er meðal annars ákærður fyrir alvarlega árás á lögreglumenn, flótta undan lögreglu, árás á lögregluhund og vörslu fíkniefnaáhalda. Hann var fluttur á sjúkrahús til skoðunar áður en hann var færður í fangelsi.
Athugasemdir