Grikkland hyggst banna aðgang barna yngri en 15 ára að samfélagsmiðlum frá og með 1. janúar 2027, að því er forsætisráðherrann Kyriakos Mitsotakis tilkynnti í dag.
Í myndskeiði sem hann birti á samfélagsmiðlinum TikTok sagði Mitsotakis að um væri að ræða „erfiða en nauðsynlega aðgerð“. Markmiðið væri ekki að halda börnum frá tækni almennt, heldur að sporna gegn ofnotkun tiltekinna forrita sem geti haft neikvæð áhrif á þroska þeirra, frelsi og vellíðan.
„Ég veit að sum ykkar munu verða ósátt,“ sagði hann og bætti við að rannsóknir bentu til þess að langvarandi skjátími hefði skaðleg áhrif á heila barna.
Grikkland er meðal fyrstu ríkja í heiminum til að grípa til slíkra aðgerða. Mitsotakis kvaðst jafnframt hyggjast beita sér fyrir því að Evrópusambandið taki upp sambærilegar reglur á vettvangi sambandsins.
Þróunin í Grikkland er í takt við aukna umræðu á alþjóðavettvangi um áhrif samfélagsmiðla á börn og ungmenni. Ástralía varð í desember fyrsta ríkið til að skylda fyrirtæki á borð við TikTok, YouTube og Snapchat til að fjarlægja aðganga notenda yngri en 16 ára, ella sæta háum sektum.
Einnig hafa yfirvöld í Indónesíu hafið framkvæmd sambærilegs banns fyrir notendur yngri en 16 ára og þegar gripið til aðgerða gagnvart tæknifyrirtækjum eins og Google og Meta vegna meintrar vanefnda á lögunum.
Í Austurríki stendur til að leggja fram frumvarp um bann við notkun samfélagsmiðla fyrir börn allt að 14 ára aldri síðar á þessu ári. Þá hafa Spánn og Danmörk einnig lýst yfir áformum um að setja svokallaðan stafrænan lögræðisaldur fyrir notkun samfélagsmiðla.
Aðgerðir þessara ríkja endurspegla vaxandi áhyggjur stjórnvalda víða um heim af áhrifum stafrænnar tækni á yngstu kynslóðirnar.
Athugasemdir